სააგენტო ,,აფსნი ლაიფის'' ცნობით, ოკუპირებულ აფხაზეთში რუსი ტურისტებით სავსე ავტობუსს ქვები დაუშინეს.
ინციდენტი მოხდა გაგრის მახლობლად, როცა სოჭიდან მომავალი ტურისტებით სავსე ავტობუსი რესტორან"გაგრიფშს" უახლოვდებოდა. ბუჩქებიდან დაშენილმა ქვებმა ავტობუსი დააზიანა, ერთ-ერთმა ქვამ მინა ჩაამსხვრია და რამდენიმე მგზავრი, მათ შორის 5 წლის ბავშვი, ნამსხვრევებით დაიჭრა.
ავტობუსში მჯდარი 52 მგზავრი სხვა ავტობუსში გადასვეს, მაგრამ ამავტობუსსაც იქვე, რამდენიმე მეტრში ხელახლა დაუშინეს ქვები. ამის შემდეგ ტურისტები საზღვრამდე პოლიციის თანხლებით მიიყვანეს.
ავტობუსის მძღოლი თავის ფეისბუქგ ვერდზე დეტალურად აღწერს მომხდარს. იგი აზუსტებს, რომ ავტობუსში მოზრდილებთან ერთად 2 – დან 6 წლამდე ასაკის ხუთი ბავშვი იმყოფებოდა.
,,ინცინდენტის შემდეგ ავტობუსი გავაჩერე და მილიცია გამოვიძახე. მილიციის თანამშრომლებთან ერთად მოვათვალიერეთ იქაურობა, მაგრამ ეს ნაძირლები ვერ ვიპოვეთ. შემდეგ მგზავრები სხვა ავტობუსში გადავსვით და საზღვრისკენ გავემართეთ, მაგრამ ჩვენი თავგადასავალი ამით არ დამთავრებულა – რამდენიმე მეტრის გავლის შემდეგ ისევ დაგვიშინეს ქვები. ერთ–ერთმა ამჯერად კარის მინა ჩაამსხვრია და პირდაპირ ფეხში მომხვდა. სანამ ნამსხვრევებს ჩამოვიფერთხავდი, ისევ უგზოუკვლოდ გაქრნენ. საბედნიეროდ, კვლავ დაგვეწივნენ მილიციის თანამშრომლები და ჰაერში სროლით გაეკიდნენ თავდამსხმელებს''– ყვება ავტობუსის მძღოლი.
თავდამსხმელებმა მიმალვა მოახერხეს. მათი ვინაობა ამ დრომდე არ არის დადგენილი.