ჯანდაცვის სამინისტროს საყოველთაო ჯანდაცვის პროგრამაში ჩართული კლინიკების მიერ არასწორად მოთხოვნილი თანხების ე.წ. ჩათვლები გაკეთების უფლება მიენიჭა. გადაწყვეტილება დღეს გამართულ მთავრობის სხდომაზე მიიღეს.
ჯანდაცვის მინისტრის განმარტებით, იკვეთებოდა პრობლემა კლინიკების მიერ ე.წ. არასწორად მოთხოვნილ თანხებთან დაკავშირებით, რაც სასამართლო დავებს და გადაწყვეტილების მიღებამდე თანხის გაყინვას იწვევდა. სწორედ ამიტომ მთავრობამ მიიღო დადგენილება, სასამართლო გადაწყვეტილებამდე თანხები შემდგომი თვის ანაზღაურებიდან დაქვითოს.
„იკვეთებოდა ხოლმე გარკვეული წილი, როდესაც კლინიკებს არასწორად ჰქონდათ მოთხოვნილი თანხები, რაზეც ჯანდაცვის სამინისტრო ადგენდა ხოლმე შესაბამის ადმინისტრაციულ აქტს, თუმცა ამ შემთხვევების უმრავლესობაში ასეთი დავები გადადიოდა სასამართლოში და გამომდინარე სადაო საკითხის მოცულობიდან და სპეციფიურობიდან, გრძელდებოდა დიდი ხნის განმავლობაში და დღეის მდგომარეობიდან ასეა," – განაცხადა სერგეენკომ.
მისივე განმარტებით, ამ ხნის განმავლობაში სადაო თანხები იყო გაყინული, უმოძრაო, რაც სერიოზული პრობლემა იყო ბიუჯეტის პარამეტრების შესრულებისათვის, ხოლო მეორეს მხრივ, კლინიკებთან აქტიური საქმიანი ურთიერთობების დასამყარებლად.
"დღეს მივიღეთ დადგენილება, რომელიც, ხაზი მინდა გავუსვა, რომ ჩვენ არ უარვყოფთ სასამართლო დადგენილების მნიშვნელობას, თუმცა სანამ სასამართლო მიიღებს დადგენილებას, ჯანდაცვის სამინისტროს მიენიჭა უფლება, რომ მისი აზრით არასწორად მოთხოვნილი თანხების ე.წ. ჩათვლები გააკეთოს. ანუ დაქვითოს შემდგომი თვის ანაზღაურებებიდან,“ – განაცხადა სერგეენკომ.