სახელწოდება უმცირესობაში შემავალ კიდევ ერთ ფრაქციას შეეცვალა – ფრაქციას “ნაციონალური მოძრაობა – საქართველოს წინსვლისთვის“, რომელსაც დეპუტატი ელენე ხოშტარია ხელმძღვანელობს, “ევროპული საქართველო უკეთესი მომავლისათვის“ ეწოდა. გარდა ამისა, როგორც ფრაქციის სხდომის დასრულების შემდეგ ჟურნალისტებს ხოშტარიამ განუცხადა, ფრაქციის შემადგენლობას ირაკლი აბესაძე და თენგიზ გუნავა დაემატნენ. მისი თქმით, “ყველა გადაწყვეტილება მიღებულია მკაცრად პარლამენტის რეგლამენტის დაცვით“. ელენე ხოშტარიას ინფორმაციით, ამ დროისთვის ფორმალურად ფრაქციის შემადგენლობაში რჩებიან ის დეპუტატები, რომლებიც პარლამენტში “ნაციონალურ მოძრაობას“ წარმოადგენენ. უნდა აღინიშნოს, რომ ირაკლი აბესაძე და თენგზიც გუნავა პარლამენტში “ნაციონალური მოძრაობის“ საარჩევნო სიით, როგორც ამ პარტიის წევრები შევიდნენ. პარლამენტის რეგლამენტის გათვალისწინებით კი, ერთი პარტიული სიით არჩეულმა ერთი პარტიის წევრებმა შეიძლება მხოლოდ ერთი ფრაქცია შექმნან. პარლამენტის წევრს, თუ მისი პარტიის წევრებმა შექმნეს ფრაქცია, უფლება არა აქვს, იყოს სხვა ფრაქციის წევრი.