ახალი წლის ღამეს, ახალი პოლიტიკური ცენტრის გირჩის ოფისში წევრებმა ზურან ჯაფარიძემ თანაპარტიელებთან და მოხალისეებთან ერთად, საჯაროდ მათ მიერვე დაანონსებული, წინასწარი ინფორმაციის თანახმად, სავარაუდოდ ნარკოტიკული საშუალების შემცველი მცენარე დათესეს. ეს უპრეცედენტო აქცია ახალმა პოლიტიკურმა ცენტრმა ჯერ კიდევ რამდენიმე თვის წინ დაანონსა იმის გამო, რომ გაფრთხილების მიუხედავად, ხელისუფლებამ ცვლილებები კანონში არ შეიტანა.
„ულტიმატუმი წავუყენეთ ახალ ხელისუფლებას და ვთხოვეთ ახალ წლამდე ნარკოპოლიტიკა შეეცვალათ, მომხდარიყო ნებისმიერი ნარკოტიკის დეკრიმინალიზაცია და მარიხუანის ლეგალიზაცია. არანაირი ცვლილებები კანონმდებლობაში არ განხორციელებულა და რამდენადაც ჩვენ გვაქვს ინფორმაცია, სერიოზული ცვლილების გატარებას არც აპირებენ. ვასრულებთ ჩვენს დანაპირებს, გირჩის წევრები და ათეულობით ადამიანი, რომელიც ჩვენთან ოფისშია შეკრებილი, საჯაროდ დავარღვევთ სისხლის სამართლის კოდექსის 265-ე მუხლს, რომელიც 12 წლამდე პატიმრობას ითვალისწინებს და ჩვენთან ოფისში პირდაპირ ეთერში, საჯაროდ დავთესავთ, დავიწყებთ კულტივაციას მარიხუანის. ჩვენთვის ეს არის თავისუფლებისთვის ბრძოლა. თუ ჩვენ არ გვაპატიმრებენ იმის გამო, რომ ვზრდით კანაფს, ცხადია, რეგიონებშიც ვერავის დააპატიმრებენ იმის გამო, რომ პირადი მოხმარებისთვის ერთი ან ორი ძირი გაზარდა თავისთვის,“ – განაცხადა გირჩის ლიდერმა ზურაბ ჯაფარიძემ.
ზურა ჯაფარიძის პრესკონფერენციიდან ცოტა ხანში, შინაგან საქმეთა სამინისტრომ გაავრცელა განცხადება, სადაც ნათქვამია, რომ გამოძიება ნარკოტიკული ნივთიერების შემცველი მცენარის უკანონო დათესვის ფაქტზე დაიწყო და რომ პოლიცია შესაბამის საგამოძიებო მოქმედებებს ატარებს.