შინაგან საქმეთა სამინისტროსთან საეჭვო ვითარებაში გარდაცვლილი ზურაბ ხუციშვილის ოჯახის წევრები და ახლობლები შეიკრიბნენ. . ისინი მომხდარის გამოძიებას ითხოვენ და ხუციშვილის გარდაცვალებაში პოლიციის თანამშრომლებს ადანაშაულებენ.
ოჯახის წევრთა განცხადებით, ხუციშვილი მასზე პოლიციის მიერ განხორციელებული დევნის შემდეგ გაუჩინარდა, სამართალდამცველებმა კი ხუციშვილის გვამი მტკვარში სამი დღის შემდეგ , 1 აგვისტოს, იპოვეს. პოლიციაში ოჯახის წევრებს განუცხადეს, რომ ავტომობილი მტკვრის მარჯვენა სანაპიროზე მიტოვებული იპოვეს, მძღოლის გაუჩინარების თაობაზე კი არაფერი იცოდნენ.
ოჯახი გამოძიების გაჭიანურებაზეც საუბრობს და სამართალდამცავებს დანაშაულის დაფარვაში ადანაშაულებს.
მომხდარზე საქმე თვითმკვლელობამდე მიყვანის მუხლით აღიძრა. ადვოკატი თვითმკვლელობის ვერსიას გამორიცხავს და საქმის დროულ გამოძიებას ითხოვს.
დამნაშავეების გამოვლენისა და მათი დასჯის მოთხოვნით გარდაცვლილის ოჯახის წევრებმა, რამდენიმე საპროტესტო აქცია უკვე გამართეს. ისინი გაჩერებას იმ დრომდე არ აპირებენ, ვიდრე ამ ბურუსით მოცულ მკვლელობასა თუ თვითმკვლელობას ფარდა არ აეხდება.