პარტია ,,ედინაია აბხაზიას’’ პოლიტსაბჭო გამოდის ინიციატივით აფხაზეთის საპარლამენტო არჩევნების წინ შემოღებულ იქნას კვოტები რუსი ეროვნების მოქალაქეებისათვის.
,,აუცილებლად მიგვაჩნია აღდგეს პარლამენტის ფორმირების პრაქტიკა, რომელსაც პირველი პრეზიდენტის ვლადისლავ არძინბას მმართველობის წლებში ჩაეყარა საფუძველი და ითვალისწინებდა კვოტებს ჩვენი ქვეყნის რამდენიმე ეთნიკური ჯგუფის წარმომადგენლებისათვის პარლამენტში. ამ პრაქტიკაზე უარის თქმამ მიგვიყვანა იქამადე, რომ დღეს აფხაზეთის პარლამენტში წარმოდგენილნი არ არიან რუსი ეროვნების მოქალაქეები– ნათქვამია ,,ედინაია აბხაზიას’’ მიმართვაში დე ფაქტო პრეზიდენტისადმი, პარლამენტის სპიკერისა და ცენტრალური საარჩევნო კომისიის თავმჯდომარისადმი , რომელიც დღეს გავრცელდა აფხაზეთის მედიაში.
,,უნდა შემუშავდეს ამ წინადადების განხორციელებაზე მიმართული მექანიზმი, რომლის საფუძველზე საზოგადოება მიიღებს საარჩევნო სისტემას და შესაბამისად საკანონმდებლო ორგანოს, სადაც ფართოდ იქნება წარმოდგენილი მრავალეროვანი აფხაზეთის ძირითადი ეთნიკური ჯგუფები – აცხადებს ,,ედინაია აბხაზია.’’
შეგახსენებთ, რომ დღევანდელ პარლამენტში აფხაზების გარდა მხოლოდ სომხები არიან წარმოდგენილი, თუმცა ისინიც გამოთქვამენ უკმაყოფილებას, რომ ეს რაოდენობა ( 3 წევრი) არ შეესაბამება აფხაზეთის მოსახლეობაში სომხების პროცენტულ შემადგენლობას. რაც შეეხება გალის ქართველ მოსახლეობას, ისინი აფხაზებს სათვალავშიც არა ჰყავთ.