დღეს თბილისში, ნოდარ დუმბაძის სახელობის მოზარდ მაყურებელთა სახელმწიფო თეატრის მცირე სცენაზე პრემიერაა. წარმოდგენილი იქნება ამ თეატრისა და შალვა დადიანის სახელობის სახელმწიფო დრამატული თეატრის ერთობლივი დადგმა „მგზნებარე შეყვარებული“ . ეს თეატრთაშორისი პროექტი საქართველოს კულტურისა და ძეგლთა დაცვის სამინისტროს მხარდაჭერით განხორციელდა.
სპექტაკლის რეჟისორია დიმიტრი ხვთისიაშვილი, სპექტაკლში მონაწილეობენ ზუგდიდის თეატრის მსახიობები მარინა დარასელია და მზევინარ ჩარგაზია და მოზარდ მაყურებელთა თეატრის მსახიობები – ნინო კიკაჩეიშვილი, სოფიო ებრალიძე, ვახტან ნოზაძე, ბესო მეგრელიშვილი, მაკა ბარდაველიძე, ნინო ლეჟავა, ხათუნა ბერძენიშვილი, ქეთი ქიტიაშვილი.
სპექტაკლი დადგმულია ამერიკელი დრამატურგის ნილ საიმონის კომედიიის მიხედვით . პიესა 1969 წელს დაიწერა, მას შემდეგ არაერთ ენაზე ითარგმნა და დღემდე მსოფლიოს უამრავი თეატრის რეპერტუარშია.
სპექტაკლის მთავარი პერსონაჟი საშუალო ასაკის, ზედმიწევნით მეოჯახე მამაკაცია, რომელიც კრიზისულ პერიოდს განიცდის. რა სიმპტომები გააჩნია “საშუალო ასაკის კრიზისს”, რაში გამოიხატება იგი და როგორ უნდა ვუმკურნალოთ მას? მზა რეცეპტი არ არსებობს, თუმცა, “პრობლემების დავიწყების საუკეთესო საშუალებად” ნილ საიმონი სიცილს გვთავაზობს, რადგან იუმორი ილუზიების დაძლევისა და საკუთარი თავის შეცნობაში გვეხმარება.
გარდა დღევანდელისა, “მგზნებარე შეყვარებულის” საპრემიერო დღეებია 23 , 24 და 25 დეკემბერიც.