თბილისის საკრებულოს ნაციონალური მოძრაობის წევრები თედო კობახიძის მხრიდან თანამშრომლებზე ზეწოლის ფაქტებზე საუბრობენ და მერიის შიდა აუდიტის სამსახურს მოუწოდებენ დაიწყოს მოკვლევა ამ საქმეზე.
სევდია უგრეხელიძე ამბობს, რომ რამდენიმე წელის გრძელდება ძველი თანამშრომლების, თავიანთი საქმის ნამდვილი პროფესიონალების შევიწროება ერთგვარი პოლიტიკური ნიშნით და მათზე ზეწოლა სრულიად უმსგავსო საქციელს იღებს. ასე ეხმაურება იგი საკრებულოს იურიდიული კომისიის მთავარი სპეციალისტის ანა ვარდოსანიძის მიერ პოსტსკრიპტუმში გაკეთებულ განცხადებას, რომ საკრებულოში არსებობენ ხელშეკრულებით დასაქმებული პირები, რომლებიც სამსახურში არ დადიან, თუმცა ხელფასებსა და პრემიებს იღებენ.
საკრებულოს იურიდიულ კომისიას დეპუტატ მანანა კობახიძის ძმა, თედო კობახიძე ხელმძღვანელობს.
ბრალდებებს თედო კობახიძე უარყოფს, თუმცა მისი სამდივნოს ყოფილმა უფროსმა, ქეთევან თურაზაშვილმა რუსთავი 2-ს დაუდასტურა, რომ ქართული ოცნების დეპუტატის მითითებით, საკრებულოს იურიდიულ კომისიაში ადამიანების ნაწილს ფიქტიურად ასაქმებენ. არის ცნობები, რომ კობახიძე ფიქტიურად დასაქმებულ ადამიანებს მიღებული ხელფასიდან წილს სძალავს.
საუბარია სხვა სკანდალურ მასალებზეც, მათ შორის საკრებულოს იურიდიული კომისიის ხუთი თანამშრომლის მოხსენებით ბარათზე, სადაც ისინი წერენ, რომ კობახიძე მათ დევნის, დისკრიმინაციას ახდენს და სამსახურიდან წასვლას აიძულებს.