ფოთელი მონადირეები ნადირობის სეზონზე არსებულ შეზღუდვებს აპროტესტებენ. მათი განცხადებით, კოლხეთის ეროვნული პარკის ტერიტორიაზე თავისუფლად გადაადგილების და ნადირობის უფლება ეზღუდებათ. კერძოდ, ისინი ყვებიან, რომ მათ პალიასტომის ტბის გავლით, იარაღის თუნდაც დაშლილ მდგომარეობაში გადატანა და იმ ადგილებამდე მიტანა, სადაც ნადირობაა ნებადართული, ეკრძალებათ. სანადირო ტერიტორიებზე მოხვედრა ეროვნული პარკის გავლის გარეშე შეუძლებელია. მონადირეები განმარტავენ, რომ გადამფრენი ფრინველები სწორედ აღნიშნულ ტერიტორიაზე ბუდობენ. კოლხეთის ეროვნული პარკის ადმინისტრაცია ამ შეზღუდვებს საკანონმდებლო რეგულაციებით ხსნის.
დღეს მონადირეთა კავშირის წარმომადგენლები და მონადირეები ფოთის მერს ირაკლი კაკულიას შეხვდნენ და მისგან შუამდგომლობის პირობა მიიღეს.
ირაკლი კაკულია მონადირეებს დახმარებას დაპირდა და განუცხადა, რომ მათ ყველა პრობლემას შესაბამის ორგანოებს გააცნობს.