შინაგან საქმეთა სამინისტრო, შობა-ახალი წლის დღესასწაულების მოახლოებასთან დაკავშირებით, მოსახლეობას პიროტექნიკის გამოყენების თაობაზე რეკომენდაციით მიმართავს.
“სამინისტრო მოუწოდებს მოქალაქეებს, სიფრთხილით მოეკიდონ სადღესასწაულო ასაფეთქებელ საშუალებებს, გამოიყენონ ისინი ინსტრუქციის მიხედვით და მოარიდონ პიროტექნიკას არასრულწლოვანი პირები, რადგან აღნიშნული საშუალებების არასწორად გამოყენება ხშირად სავალალო შედეგებით – ჯანმრთელობის სხვადასხვა სიმძიმის დაზიანებებით სრულდება. შინაგან საქმეთა სამინისტრო მოუწოდებს მოქალაქეებს, პიროტექნიკის გამოყენებისას მაქსიმალურად დაიცვან უსაფრთხოების წესები და გაუფრთხილდნენ საკუთარ და გარშემომყოფი ადამიანების ჯანმრთელობას”, – ნათქვამია შინაგან საქმეთა სამინისტროს მიერ გავრცელებულ განცხადებაში.
შეგახსენებთ ჩვენს წინამორბედ ნიუსს – მიუხედავად იმისა, რომ პიროტექნიკის გამოყენების პიკი ჯერ კიდევ შორსაა და ბავშვები მხოლოდ ახლა იწყებენ ,,ბათქა- ბუთქს'' ქუჩებში, წინა წლების სამწუხარო გამოცდილებას უკვე ორი შემთხვევა შემატა. ფოტოზე, რომელსაც გ. იაშვილის სახელობის თერმული დაზიანებისა და აღდგენითი პლასტიკური ქირურგიის ცენტრის ხელმძღვანელი გუგა ქაშიბაძე ავრცელებს, გამოსახულია ხელისგული სამი წლის ბავშვისა, რომელსაც საახალწლო სატკაცუნა აუფეთქდა .