განათლების სამინისტროში ადასტურებენ, რომ უამინდობისა და გათბობის საკითხის მოუგვარებლბის გამო თბილისისა და რეგიონების რიგ საჯარო სკოლაში პრობლემები შეიქმნა . . მინისტრის მოადგილე ლია გიგაური აცხადებს, რომ სკოლებში არსებული პრობლემების აღმოსაფხვრელად სამუშაოები უკვე მიმდინარეობს.
ვრცელდება ინფორმაცია, რომ მეორე დღეა რუსთავის 21-ე სკოლის მოსწავლეებს ცენტრალური გათბობის გარეშე დარჩენილ შენობაში უწევთ სწავლა, რადგან გამათბობლის ძრავა გადაიწვა. სასწავლებლის ადმინისტრაციამ მის აღდგენამდე, სიცივის გამო გაკვეთილების ხანგრძლივობა შეამცირა და სკოლის ალტერნატიული გათბობის საშუალებაზე გადავიდა, კლასებში მოსწავლეები ელექტრო გამათბობლებით თბებიან.
გორის რაიონის სკოლაში მილი გაიყინა და ამ დრომდე საკლასო ოთახების გათბობას ელექტრო ქურებით ცდილობენ. ახალციხის რაიონის სკოლებში კი ძლიერი ქარის გამო ღუმელის ანთებას ვერ ახერხებენ და გაკვეთილების ჩატარება ცივ საკლასო ოთახებში უწევთ.
გაკვეთილების ხანგრძლივობა 35 წუთამდე შეამცირეს თბილისის და რეგიონის რამდენიმე სკოლაშიც – ამ რეჟიმით კი სკოლები მანამდე იმუშავებს, ვიდრე პრობლემა საბოლოოდ არ მოგვარდება.
დღეს ზუგდიდშიც მოთოვა და სინოპტიკოსები ტემპერატურის შემდგომ ვარდნასა და ყინვების გაძლიერებაზე საუბრობენ. ჯერჯერობით სასწავლო პროცესის შეწყვეტის ან შეფერხების შესახებ ოფიციალური ინფორმაცია არ გავრცელებულა, თუმცა მშობლები ,,ოდიში ნიუსთან” საუბარში საკლასო ოთახებში მინიმალურ სტანდარტებზე დაბალ ტემპერატურაზე საუბრობენ და ამბობენ, რომ თუ ასე გაგრძელდა, იძულებული გახდებიან ბავშვების სკოლაში გაშვებისგან თავი შეკავონ.