დღეს კიევში მიხეილ სააკაშვილის მიერ ორგანიზებულ საპროტესტო აქციაზე უკრაინის რადას დათხოვნისა და ახალი საპარლამენტო არჩენების დანიშვნის მოთხოვნით მისი ახალი პოლიტიკური მოძრაობის მრავალი ათასი მხარდამჭერი შეიკრიბა, თუმცა უკრაინის პრორუსი ოლიგარქებისა და კრემლის მიერ მართულ რუსულ მედიაში მთელი დღის მანძილზე ვრცელებოდა ხალხის შეკრების პროცესსა და აქციის დასაწყისში გადაღებული ფოტოები და ინფორმაცია, რომ მიტინგზე სულ 200 – დან ხუთასამდე ადამიანი შეიკრიბა.
ასეთია სამწუხარო მაგალითი იმისა, როგორ ჩაეფლო სიცრუეში ოლიგარქების მიერ მართული მედია. მაგრამ ამაში არაფერია გასაკვირი, მისი ერთი ნაწილი ეკუთვნის კოლომოისკის, მეორე რუსეთში გაქცეულ სხვა ოლიგარქებს. მაშინ, როდესაც ისინი საათობით აჩვენებდნენ ადრინდელ, მართლაც არცთუ ისე მრავალრიცხოვან მიტინგებს, დღეს ჩვენთან მიმართებაში დუმილის აღთქმა დადეს. ეს სიცრუის სამეფო ძალიან ცუდად მიცნობს და ვერ ხვდება, რომ ამით მხოლოდ მაძლიერებს ჩემს საბრძოლო განწყობაში – ასე ეხმაურება მიხეილ სააკაშვილი თავის ფეისბუქ გვერდზე დღევანდელი მრავალათასიანი მიტინგის შესახებ გავრცელებულ დეზინფორმაციას.