ჩემთვის მტკივნეულია, რომ დღეს საქართველოსა და უკრაინას ფაქტობრივად ურთიერთობა არ აქვთ, – ამის შესახებ უკრაინის ყოფილმა პრეზიდენტმა ვიქტორ იუშჩენკომ განაცხადა.  იუშჩენკო საქართველოში არაოფიციალური ვიზიტით იმყოფება. ყოფილი პრეზიდენტი გავრცელებულ ინფორმაციებზე კომენტარის გაკეთებისგან თავს იკავებს და აცხადებს, რომ არ სურს კომენტარი გააკეთოს ისეთ საკითხებზე, რომლის შესახებაც ყველაფერი არ იცის.”არ მინდა კომენტირება გავრცელებული ხმების და განცხადებების, რომლებთანაც შეხება არ მაქვს. ჩემთვის მტკივნეულია, რომ დღეს საქართველოსა და უკრაინას ფაქტობრივად ურთიერთობა არ აქვთ. ჩემი აზრით, არ არსებობს ორმხრივი გეგმა, თუ როგორ ვხედავთ ურთიერთობას დღეს და ხვალ, როგორი უნდა იყოს განვითარება. ვფიქრობ, საქართველო და ქართველი თავად გაერკვევა იმ მიღწევებში, რომელიც მიხეილ სააკაშვილს აქვს გაკეთებული. ადრე თუ გვიან ეს ყველაფერი თავის ადგილას დადგება. როცა ჩვენ გავიღვიძებთ, დღის წესრიგში ისევ დადგება ის საკითხები, რომელიც ახლა აკლია ჩვენი სახელმწიფოების ურთიერთობას, ეს არის მუდმივი კავშირები”, – განაცხადა იუშჩენკომ.