,,ვიმედოვნებთ,  სომხეთი უახლოეს მომავალში ოფიციალურად აღიარებს აფხაზეთის დამოუკიდებლობას, თუმცა გვესმის, რა გართულებები შეიძლება მოჰყვეს ამას'' – განაცხადა „აფხაზეთის სომეხთა კავშირის“ თავმჯდომარის მოვალეობის შემსრულებელმა  ლევონ გალუსტიანმა ერევანსა და სოხუმს შორის გუშინ გამართულ ონლაინ პრესკონფერენციაზე,   რომელშიც დე ფაქტო აფხაზეთის პარლამენტარები, ჟურნალისტები და საზოგადოებრივი ორგანიზაციების წარმომადგენლები მონაწილეობდნენ.

ლევონ გალუსტიანმა, რომელიც სეპარატისტთა მხარეს იბრძოდა 90 – იანი წლების ეთნოკონფლიქტში და ამ დამსახურების საფუძველზე აფხაზეთის  არაერთი მოწვევის დე ფაქტო პარლამენტის წევრიც არის, ისაუბრა სომხური თემის მდგომარეობაზე აფხაზეთში და ხაზგასმით აღნიშნა, რომ ერევანმა მხედველობაში უნდა მიიღოს, რა დიდი ხელშეწყობა აქვს მის თემს აფხაზეთის ხელისუფლებისა და საზოგადოების  მხრიდან.

,,აფხაზეთში 42ათასი სომეხი ცხოვრობს, ისინი   რესპუბლიკის სოციალურ -პოლიტიკური ცხოვრების ყველა სფეროში არიან  წარმოდგენილნი და  არანაირი  პოლიტიკური პრობლემა არა აქვთ. რაც შეეხება ცხოვრების სხვა სფეროებს,  ადგილობრივი სომხური   თემის მდგომარეობა არ განსხვავდება აფხაზთა ცხოვრებისაგან თავისი პრობლემებით და მიღწევებით.  აფხაზეთში 26 სომხური სკოლაა გახსნილი, არა გვაქვს შეფერხებები სახელმძღვანელოებთან და პედაგოგიურ კადრებთან დაკავშირებით, სახელმძღვანელოები და სხვა სახის ლიტერატურა, პერიოდული პრესა  შეუფერხებლად გვეგზავნება სომხეთიდან,  სკოლებში ყველა შესაძლებლობაა იმისთვის,  რომ სომეხი ბავშვები ღრმად დაეუფლონ მშობლიურ ენას, ისწავლონ იმ პროგრამით, რომელიც სომხეთშია შემუშავებული და, შესაბამისად, თავისუფლად შეუძლიათ მოემზადონ მისაღები გამოცდებისათვის სომხეთის უმაღლეს სასწავლებლებში. 

აფხაზეთის სომხური თემი  წარმატებით ასრულებს შუამავლის როლს სომხეთსა და აფხაზეთს შორის ეკონომიკური, კულტურული და  სხვა სახის თანამშრომლობის განვითარებაში.  ჩვენთვის მთავარია, რომ კარგი ურთიერთობები გვაქვს აფხაზებთან, სწორედ ამიტომ არის აქ ცხოვრება  ჩვენთვის კომფორტული და ამას დიდად  ვაფასებთ და ვუფრთხილდებით.'' – განაცხადეს ონლაინ პრესკონფერენციის მონაწილეებმა.