მედიასივრცეში ვრცელდება ინფორაცია, რომ ვიქტორ დოლიძე შესაძლოა ევროპასთან ინტეგრაციის საკითხებში სახელმწიფო მინისტრის პოსტზე დაინიშნოს. ამავე დროს სოციალურ ქსელში გამოითთქმის ვარაუდი, რომ ირაკლი ალასანიასა და ალექსი პეტრიაშვილის განცხადებები პარტიიდან წასვლის შესახებ ივანიშვილთან ვაჭრობის შემადგენელი ნაწილია და მათ პირად პერსპექტივაზე გათვლილი ნაბიჯი.
”ქართული ოცნების” ერთ-ერთი ლიდერი გია ვოლსკი უარყოფს გავრცელებულ ინფორმაციას და კატეგორიულად გამორიცხავს ”თავისუფალი დემოკრატების” რომელიმე წარმომადგენლის შესაძლო დანიშვნას სახელმწიფო პოლიტიკურ თანამდებობაზე .
„ეს საკითხი არ განხილულა და ალბათ არც განიხილება. არ ვიცი ვინ შემოიტანა აღნიშნული საკითხი მედიასივრცეში. რაღაც სკანდალური თემის შემოტანას გავს. მე ერთხელ ვთქვი, რომ პარლამენტში კარგი თანამშრომლობა გვქონდა ვახტანგ ხმალაძესთან, რომელიც იურიდიულ საკითხთა კომიტეტს ხელმძღვანელობდა. ასევე შევაქე საფინანსო-საბიუჯეტო კომიტეტში თანამშრომლობის გამო ნოდარ ებანოიძე. ვიქტორ დოლიძესთან დაკავშირებით ვთქვი, რომ ძალიან პროდუქტიული იყო მასთან ერთად თანამშრომლობა საერთაშორისო საპარლამენტო სტრუქტურებში. შევაქე იგი როგორც გამოცდილი დიპლომატი და ადამიანი, რომელიც ჯერ ქვეყანაზე ფიქრობს და ამის შემდეგ პარტიულ შიდა ინტერესებზე. ეს არანაირად არ ნიშნავს რომელიმე კანდიდატურის განხილვას რაიმე სახელმწიფო თანამდებობაზე. ამის თაობაზე არავის არაფერი უთქვამს და გავრცელებული ინფორმაცია სიმართლეს არ შეესაბამება”, – განაცხადა ვოლსკიმ ინტერპრესნიუსთან საუბარში.
მისივე თქმით, მით უფრო ამ კონტექსტში საუბარი არ ყოფილა ირაკლი ალასანიასა და ალექსანდრე პეტრიაშვილზე, რომელთა ხედვები და პოზიციები ”ქართული ოცნებისათვის” შეუსაბამოა.