თანხის გამოძალვის ფაქტზე დაკავებულია ცენტრალური კრიმინალური პოლიციის დეპარტამენტის იმერეთის სამხარეო დეპარტამენტის უფროსი გიორგი კაჭარავა. განცხადება ამის შესახებ შსს-ს საზოგადოებასთან ურთიერთობის სამსახურის უფროსმა თეა პერტაიამ გააკეთა.
გამოძიებამ დაადგინა, რომ კაჭარავამ ნარკოტიკული საშუალების უკანონო შეძენა-შენახვის ფაქტზე მოწმის სახით დაბარებულ მოქალაქეს უსაფრთხოების და ხელშეუხებლობის გარანტად და ასევე ნარკოტიკული საშუალების უკანონო შეძენა-შენახვის ფაქტზე დაკავებული მისი ახლობლისათვის საპროცესო შეთანხმების გაფორმების უზრუნველსაყოფად გარკვეული თანხის გადახდა მოსთხოვა.
დიდი ოდენობით ქრთამის გამოძალვის ფაქტზე დაკავებულს ბრალს ოფიციალურად დღეს უნდა წაუყენებენ. – ნათქვამია განცხადებაში
თავად დაკავებული ბრალს არ აღიარებს. “ჩემი კლიენტი არ აღიარებს მოცემულ დანაშაულს და მიმდინარეობს საგამოძიებო მოქმედებები. ბრალი ჯერ არ წაუყენებიათ. იგი ქუთაისიდან თბილისში მოდულის შენობაში გადმოჰყავთ, იქ წარმოებს სისხლის სამართლის საქმე, სასამართლოც სავარაუდოდ იქ იქნება,“- განაცხადა დაკავებულის ადვოკატმა თემურ მესხმა.