,,შენი ხმა ჩვენი მომავალია'' კამპანიის ფარგლებში საქართველოს პრეზიდენტი რეგიონებში საზაფხულო სკოლებში ახალგაზრდებთან შეხვედრებს განაგრძობს.
გუშინ გიორგი მარგველაშვილი ანაკლიის საზაფხულო სკოლაში მყოფ ახალგაზრდებს გაესაუბრა.
არჩევნებზე საზოგადოების აქტიურობის მნიშვნელობასთან ერთად, პრეზიდენტმა აქცენტი საქართველოს ტერიტორიული მთლიანობის აღდგენასა და ქვეყნის ევროპულ და ევროატლანტიკურ სტრუქტურებში ინტეგრაციის მნიშვნელობაზე გააკეთა.
პრეზიდენტმა დასმულ შეკითხვებსაც უპასუხა.
„საოცარ ადგილას შევიკრიბეთ და საოცარ მხარეში. პირდაპირ ჩანს ჩვენი მიწა, აფხაზეთი, რომელსაც დაეუფლნენ ასე უკანონოდ. ჩვენ სწორი პოლიტიკით და სწორი ნაბიჯებით, უნდა აღვადგინოთ ჩვენი სახელმწიფოს მთლიანობა, ის, რითიც უნდა დაბრუნდეს აფხაზეთი, ეს არის ქართული საზოგადოების გაძლიერება, დემოკრატიული განვითარება, თავისუფლება, ეკონომიკის წინსვლა, – განაცხადა პრეზიდენტმა
,,დღეს საოცარ ადგილას შევიკრიბეთ, საიდანაც პირდაპირ ჩანს ჩვენი ისტორიული მიწა აფხაზეთი, რომელსაც დაეუფლნენ ასე უკანონოდ, რომელიც დაპყრობილია და რომელიც აუცილებლად დაგვიბრუნდება. ის, რითიც უნდა დაბრუნდეს აფხაზეთი, ეს არის ქართული საზოგადოების გაძლიერება, დემოკრატიული განვითარება, თავისუფლება, ეკონომიკის წინსვლა. ეს მინდა იყოს ნაჩვენები აფხაზებისთვისაც და ოსებისთვისაც. ის პერსპექტივა უნდა იყოს ნაჩვენები, რომ ჩვენ ვვითარდებით, აფხაზების საკითხიც უნდა იყოს გარკვეულწილად გაზიარებული, ის რა ფორმით ხედავენ აფხაზეთს ჩვენს მომავალში. ბოლო 2 წლის განმავლობაში მაქვს მცდელობა ქართულ პოლიტიკურ სპექტრში და საზოგადოებაში ერთიანი მესიჯი ჩამოვაყალიბო, რომ შევთანხმდეთ ძირითად მესიჯებზე, ჩამოვაყალიბოთ ერთიანი ხედვა, რასაც ვეუბნებით აფხაზებს – როგორ ვხედავთ აფხაზეთის და ოსეთის მომავალს, ერთიანი მესიჯი უნდა მიდიოდეს, აფხაზეთში, ოსეთში, მოსკოვსა და ვაშინგტონში. ხედვის მთლიანობა უნდა ჩამოვაყალიბოთ და უბრალოდ, გაერთიანებაზე საუბარი დღეს საკმარისი არ არის. ჩვენ უნდა ვუთხრათ მათ როგორ სახელმწიფოს ვაშენებთ, ვაჩვენოთ ეს სახელმწიფო, მოვაწონოთ ეს სახელმწიფო, მოვაწონოთ ეს სახელმწიფო მომავალ ქართულ სახელმწიფოში. მათ უნდა მოსწონდეთ ის როლი, რომელსაც ისინი ითამაშებენ ერთიან საქართველოში. არც აფხაზებს და არც ოსებს რუსეთის ფედერაციის შემადგენლობაში გაერთიანებით დადებითი პერსპექტივა არ გააჩნიათ. თავისუფლება არის მრავალფეროვნება რომელიც ქმნის ერთიანობას", – აღნიშნა საქართველოს პრეზიდენტმა.როდესაც აქ ვართ, განსაკუთრებული გრძნობა და განსაკუთრებული პასუხისმგებლობა გვეუფლება. ხდება იმის გააზრებაც, რომ შეცდომები დავუშვით და იმის გააზრებაც, რომ აუცილებლად, სწორი პოლიტიკით და სწორი ნაბიჯებით უნდა აღვადგინოთ ის ყველაზე მნიშვნელოვანი, რაც გადმოგვცეს ჩვენმა წინაპრებმა, ჩვენი სამშობლოს – საქართველოს მთლიანობა", – მიმართა საქართველოს პრეზიდენტმა პროექტის მონაწილეებს.
გიორგი მარგველაშვილის განცხადებით, ისტორიული უსამართლობის დაძლევა მოხდება, როცა საზოგადოება ძლიერი ქვეყნის შენების სურვილით გაერთიანდება.
გიორგი მარგველაშვილის განცხადებით, ჩვენი ქვეყნის 20 % ბირთვული სახლემწიფოს მიერაა ოკუპირებული, რომელმაც სამხედრო ძალით მოახდინა ჩვენი სამშობლოს ტერიტორიების ოკუპაცია.
”უსაფრთხოების თვალსაზრისით, სერიოზული გამოწვევები გვაქვს, მაგრამ ჩვენ შევდექით არა მარტო სახელმწიფოდ, არამედ ჩვენ შევდექით ლიდერ ქვეყანად რეგიონში დემოკრატიის განვითარების თვალსაზრისით, იმ ეკონომიკური, გეოპოლიტიკური პროექტებით, რომელიც საქართველოსთანაა დაკავშირებული. რა სტრატეგია გვაქვს ამასთან მიმართებაში? უნდა გავაღრმავოთ დემოკრატიული სახელმწიფოს მშენებლობა, გავაძლიეროთ ორიენტაცია იმ პოლიტიკურ და სამხედრო-პოლიტიკურ ბლოკებზე, როგორიცაა ევროკავშირი და ნატო. ამ ორივე მიმართულებაში ჩვენ წარმატებული დღის წესრიგი გვაქვს, თუმცა ბუნერივია გვინდა, რომ უფრო სწრაფად ხორციელდებოდეს ეს. რაც შეეხება რუსეთთან ურთიერთობას, ამასთან მიმართებაშიც ჩვენი პოლიტიკა არის მცდელობა რუსეთთან სიტუაციის არდაძაბვის, რაციონალური, მშვიდი დიალოგის. მცდელობა, რომ მოხდეს დაპირისპირებული თემების დიპლომატიურ კონტექსტში გადატანა და არა სამხედრო კონტექსტში. ჩვენ არ ვცდილობთ, რომ რუსეთს ვეომოთ. ჩვენ ვცდილობთ, რომ რუსეთი მივიყვანოთ საერთაშორისო სამართლის დისკუსიამდე და ამ მიმართულებით ვიმოძრავებთ მომავალშიც", – განაცხადა ახალგაზრდებთან საუბრისას გიორგი მარგველაშვილმა.