დღეს დილით თურქეთის პროვინცია დიარბაქირში აეროპორტი დაიბომბა. სარაკეტო ცეცხლის ქვეშ მოექცა აეროპორტის ნაწილი, არის ნგრევა, მაგრამ დაღუპულნი და დაშავებულნი არ არიან. – იუწყება სააგენტო Trend – ი თურქულ მედიაზე დაყრდნობით.
ავიაიერიში ელვის სისწრაფით განხორციელდა და, როგოც ჩანს, მისი მიზანი შიშის დათესვა და სირიაში თურქეთის მიერ წარმოებული სამხედრო ოპერაციის მიმართ პროტესტის გამოხატვა იყო. ადგილზე სასწრაფოდ იქნა მობილიზებული სასწრაფო –სამედიცინო დახმარებისა და სამაშველო სამსახურები.
პასუხისმგებლობა ამ ინციდენტზე ამ დრომდე არავის აუღია.
თურქეთის მთავრობა ავრცელებს განცხადებას, რომ მომხდარის უკან ტერორისტული ორგანიზაცია – ქურთისტანის მუშათა პარტია დგას.
ამასობაში კი თურქეთი აგრძელებს ავიაიერიშებს სირიაში. გუშინ და დღეს თურქეთის ავიაციის დარტყმებს ქალაქ ჯერაბლუსის მახლობლად თურქეთის მთავრობის განცხადებით ,,25 ადამიანი ემსხვერპლა, დაღუპულები ქურთი მებრძოლები არიან.'' უფლებადამცველები ლი ირწმუნებიან, რომ სირიის ჩრდილოეთ რეგიონებში 35 მშვიდობიანი მოქალაქე და მხოლოდ 4 მებრძოლია დაღუპული.
ოფიციალურმა ანკარამ სირიის ტერიტორიაზე დამატებით სამხედრო ძალა და ტექნიკა მას შემდეგ შეიყვანა, რაც სახმელეთო ოპერაციას პირველი მსხვერპლი მოჰყვა. ქურთი მებრძოლების მიერ გვიან ღამით, ტანკების კოლონაზე განხორციელებული სარაკეტო იერიშის შედეგად ერთი თურქი სამხედრო დაიღუპა, სამი კი დაშავდა.