ზუსტად 8 საათი ელოდა ენგურის ხიდზე ჟურნალისტებთან ერთად, ლალი ბასარია მისი მეუღლის გიორგი ლუკავას განთავისუფლებას. გიორგი ლუკავა 2011 წელს აფხაზეთში „ტყის ძმების“ ხელმძღვანელობის ბრალდებით დააკავეს და ოც წლიანი პატიმრობა მიუსაჯეს , ის უკვე მეოთხე წელია რაც „დრანდის“ ციხეში იხდის სასჯელს.
ლალი ბასარია ჩვენთან საუბარში განმარტავს, რომ ის ამ საქმესთან დაკავშირებით ყოფილ სახელმწიფო მინისტრს, პაატა ზაქარეიშვილსაც შეხვდა, ზაქარეიშვილი მას აფხაზებთან მოლაპარაკებას და ტყვეების გაცვლას დაჰპირდა. მისი ინფორმაციით, გიორგი ლუკავას განთავისუფლება სწორედ დღეს, 2 აგვისტოს უნდა მომხდარიყო, თუმცა მოლოდინი ამაო აღმოჩნდა , რადგან გალში ინციდენტების პრევენციისა და მათზე რეაგირების მექანიზმების ხუთმხრივი შეხვედრა უშედეგოდ დასრულდა. სახელმწიფო უსაფრთხოების დეპარტამენტის ხელმძღვანელის, დავით კობახიძის განცხადებით, გიორგი ლუკავას განთავისუფლება საერთოდ არ იყო ნახსენები ტყვეთა გაცვლის დოკუმენტში, მაგრამ ქართული მხარე ყველაფერს გააკეთებს იმისთვის, რომ ლუკავა დროზე ადრე განთავისუფლდეს პატიმრობიდან.
გიორგი ლუკავას მეუღლე ქართულ დელეგაციას უმოქმედობაში და აფხაზურ მხარესთან გარიგებაში ადანაშაულებს , იგი მომავალში ენგურის ხიდზე ფართო მაშტაბიანი აქციებით იმუქრება.