პრეზიდენტის ადმინისტრაციის პრესსამსახურის ინფორმაციით, გიორგი მარგველაშვილი ბათუმში იმყოფება და აჭარის უმაღლეს საბჭოში კონსულტაციებს განაგრძობს. შეხვედრებზე განიხილება კანდიდატურა, რომელიც პრეზიდენტმა აჭარის ავტონომიური რესპუბლიკის მთავრობის მეთაურად უნდა წარადგინოს – კერძოდ, ამ პოსტზე განიხილება ზურაბ პატარაძის კანდიდატურა. პრეზიდენტი გუშინ უმაღლესი საბჭოს ფრაქციების "თანასწორობის" , ხოლო დღეს ფრაქცია "დემოკრატიული აჭარის" წარმომადგენლებს შეხვდა.
გუშინ დეპუტატთა ნაწილის უკმაყოფილება გამოიწვია იმან, რომ პრეზიდენტი ფაქტობრივად მხოლოდ ფრაქციების თავმჯდომარეებთან გადის კონსულტაციებს. ისინი მიუღებლად თვლიან ამ საკითხის დახურულ ფორმატში განხილვას , რადგან შეხვედრებზე შერჩევითად მიიყვანეს დეპუტატები და მატში მონაწილეობის შესაძლებლობა არ მიეცა უმაღლესი საბჭოს სხვა წევრებს.
დეპუტატებს ნაციონალური მოძრაობიდან საკამათოდ მიაჩნიათ პატარაძის კანდიდატურა, ,,წარმოდგენილი კანდიდატი საერთოდ არ იცნობს რეგიონს და ეს არ შეუწყობს ხელს რეგიონის მოსახლეობის განვითარებას“- აცხადებს დეპუტატი პეტრე ზამბახიძე.
,,ქართული ოცნების'' დეპუტატების თქმით, მათ საჭიროზე მეტი ხმა აქვთ პატარაძის კანდიდატურის მხარდასაჭერად უმაღლესი საბჭოს რიგგარეშე სხდომაზე, რომელიც სავარაუდოდ ხვალ გაიმართება