საქართველოს ეროვნული უშიშროების საბჭომ სამხედრო-სავალდებულო სამსახურში გაწვევის გაუქმების თაობაზე მინისტრ თინა ხიდაშელის ბრძანება თავდაცვის სამინისტროდან გამოითხოვა. როგორც ირკვევა, უწყებაში ამ ინიციატივის თაობაზე მხოლოდ
ზეპირი განცხადების მეშვეობით შეიტყვეს . ,,თავდაცვის მინისტრის ხელმოწერილი ოფიციალური დოკუმენტი უკვე გამოვითხოვეთ სამინისტროდან. აღნიშნულთან დაკავშირებით კომენტარსაც მისი გაცნობის შემდეგ გავაკეთებთ”, – აღნიშნეს ეროვნული უშიშროების საბჭოში.
შეგახსენებთ, დღეს დილით მედიასთან შეხვედრაზე თავდაცვის მინისტრმა თინა ხიდაშელმა ხელი მოაწერა ბრძანებას თავდაცვის სამინისტროს მიერ სამხედრო-სავალდებულო სამსახურში გაწვევის გაუქმების შესახებ.
”მე დავდე პირობა, რომ ყველაფერი გავაკეთებდი, რათა 2017 წლიდან ჯარში გაწვევა აღარ არსებობდეს. ჩვენ ბევრი ვეცადეთ საკანონმდებლო თვალსაზრისით ამ პრობლემის მოგვარება, რომ საერთოდ აგვეკრძალა გაწვევა შეირაღებულ ძალებში, ეს არ გამოვიდა. თუმცა, ვიპოვეთ სხვა ფორმა, რომლითაც თავდაცვის მინისტრს შემიძლია, რომ ეს გადაწყვეტილება ცალხმრივად და ერთპიროვნულად მივიღო. დღეიდან მოყოლებული, თავდაცვის სამინისტრო ოფიციალურად აღარ განახორციელებს გაწვევას და მოთხოვანს, წვევამდელების გაწვევაზე. ძალით მოყვანილი სამხედროები არ სჭირდება შეირაღებულ ძალებს'', – განაცხადა ხიდაშელმა.
როგორც მან აღნიშნა, იმ შემთხვევაში თუ თავდაცვის შემდგომი მინისტრი სამხედრო სავალდებულო სამსახურის აღდგენას გადაწყვეტს, მას მისი ამ ბრძანების გაუქმება მოუწევს.
აღსანიშნავია, რომ თავდაცვის სამინისტროს გარდა, სამხედრო-სავალდებულო სამსახურში გაწვევას სხვა უწყებებიც ახორციელებენ, თუმცა თინა ხიდაშელის ბრძანება მათ არ ეხებათ.