თემო შენგელაიას ლექსების პირველი კრებულის „თვალები გეტყვის“ პრეზენტაცია პოეტის მშობლიურ ქალაქში გაიმართა.ღონისძიება არტ-ჰაუსში აკაკი წერეთლის სახელობის ცენტრალური ბიბლიოთეკის ორგანიზებით ჩატარდა.
ახალგაზრდა პოეტმა თანაქალაქელებთან შეხვედრაზე წაიკითხა ლექსები კრებულიდან, ისაუბრა თავის შემოქმედებაზე და მოწვეული სტუმრების კითხვებსაც უპასუხა. იგი ამბობს, რომ წერს ზუსტად ისე, როგორც განიცდის, აქვს საკუთარი შეხედულებები ამა თუ იმ საკითხზე, დარწმუნებულია, რომ დღევანდელ პოეზიასაც ეპოქა დაარქმევს თავის სახელს.
კრებულში თავმოყრილია ახალგაზრდა პოეტის ლექსები. თავად ავტორი ამბობს, რომ „თვალები ყოველთვის ყველაფერზე უფრო მეტია, თვალები ყველა ცუდის და კარგის სხეულიდან გამოსასვლელი ბილიკია, თვალები იმაზე უფრო მეტის მთქმელია ვიდრე ენა, იმაზე ბასრი ვიდრე დანის პირი და იმაზე ღრმა ვიდრე მარიანის ღრმული.ჩვენი სულისა სხეულთან გამყოფი ორი ყველაზე მეტყველი კარიბჭე…“
თემო შენგელაიამ სტუმრებს მადლობა გადაუხადა და აღნიშნა, რომ მშობლიურ ქალაქში შეხვედრებს სულ სხვა ხიბლი აქვს..