წალენჯიხის რაიონის გამგეობის შენობის წინ, სოფელ ნაკიფუს მოსახლეობა გზის მშენებლობის მოთხოვნით საპროტესტო აქციას მართავს.
აქციის მონაწილეების განცხადებით, ადგილობრივი მთავრობა უკვე წლებია მათ პრობლემას ყურადღებას არ აქცევს და იმ შემთხვევაში, თუ მათი მთავარი მოთხოვნა არ დაკმაყოფილდება, პერმანენტულ აქციებს დაიწყებენ და უფრო მეტიც, არჩევნებში მონაწილეობას არ მიიღებენ.
ამ წუთებში გამგებელი გოგა გულორდავა აქციის მონაწილეებთან შესახვედრად მივიდა.
შეგახსენებთ, რამდენიმე დღის წინათ ნაკიფუს მოსახლეობამ იგივე მოთხოვნით წალენჯიხა-ზუგდიდის ცენტრალური გზის პიკეტირება მოაწყო და მხოლოდ მას შემდეგ შეწყვიტა, რაც მათთან სამეგრელო-ზემო სვანეთის სამხარეო ადმინისტრაციის წარმომადგენელები მივიდნენ და სოფლის გზის მშენებლობის პროექტის შესახებ დეტალური ინფორმაცია მიაწოდეს. აქციის განახლება, როგორც წალენჯიხის გამგეობასთან შეკრებილები ამბობენ, ამ ინფორმაციის არასანდოობამ განაპირობა.