ვანო მერაბიშვილის საქმეზე სტრასბურგის სასამართლოს გადაწყვეტილება იყო თბილისში მიმდინარე ადვოკატთა საერთაშორისო კონფერენციიის ერთერთი მთავარი თემა.
კონფერენციას ესწრებოდნენ ევროსაბჭოს ოფისის ხელმძღვანელი და ევროკავშირის ოფისის წარმომადგენელი, რომელთაც ამ საკითხზე ისაუბრეს.
"ჩვენ ველოდებით, რომ ცალკეულ პიროვნებებს ექნებათ შესაძლებლობა დაიცვან საკუთარი უფლება. საქართველოს მთავრობამ უნდა გადაწყვიტოს, როგორ მოიქცეს სტრასბურგის სასამართლოს გადაწყვეტილებასთან დაკავშირებით, იმ ფაქტის გათვალისწინებით, რომ სასამართლო სისტემა დამოუკიდებელია და კონსტიტუციის ფარგლებში უნდა განიხილებოდეს“ – განაცხადა საქართველოში ევროპის საბჭოს ოფისის ხელმძღვანელმა კრისტიან ურსემ.
ევროკავშირის ოფისის წარმომადგენელის შტეფეა შთორქის თქმით, ნებისმიერი გადაწყვეტილება, რომელსაც სტრასბურგის სასამართლო იღებს, დეტალურად უნდა იყოს შესწავლილი და ის დარწმუნებულია, რომ საქართველოს ხელისუფლება ასეც მოიქცევა.
"მე კომენტარს ვერ გავაკეთებ კონკრეტულ გადაწყვეტილებაზე. თუმცა, დარწმუნებული ვარ, რომ ქართველმა იურისტებმა იციან, რა უნდა გააკეთონ სასამართლოს გადაწყვეტილების ინპლემენტაციისთვის“ – აღნიშნა შტეფეა შთორქიმ.
ადვოკატთა კონფერენციაზე სიტყვით გამოვიდა ადვოკატთა ასოციაციის ხელმძღვანელი ზაზა ხატიაშვილი. მისი თქმით, თუ ხელისუფლება ოთარ ფარცხალაძის პასუხისმგებლობის საკითხს არ დააყენებს, რთულ სიტუაციაში ჩავარდება, რადგან მე-18 მუხლი, არის საკმაოდ სერიოზული დარტყმა ქართულ სახელმწიფოზე და დღევანდელ ხელისუფლებაზე.
"თუ ტვინი აქვს ხელისუფლებას სასწრაფოდ უნდა დაიწყონ სისხლის სამართლებრივი დევნა ფარცხალაძესთან და დარბაისელთან მიმართებაში. შოთაძე ვალდებული იყო დავალება მიეცა პროკურორისათვის და დაეწყო გამოძიება. ვალდებული იყო, თუ ვალდებულებით ნორმას ვინმე არღვევს, ამას მოსდევს სისხლის სამართლებრივი პასუხისმგებლობა, თანამდებობის უფლებამოსილების მინიმუმ გადამეტება. ვინც ვალდებული იყო, რომ გამოძიება ეწარმოებინა და არ აწარმოა, აუცილებლად დაისჯება“ – განაცხადა ხატიაშვილმა.