საარჩევნო კოდექსში ცვლილებები შედის. არჩევნების დღეს პოლიციელებს, კენჭისყრის შენობის მიმდებარე ტერიტორიაზე, საარჩევნო კომისიის თავმჯდომარის მოთხოვნისა და თანხმობის გარეშეც ექნებათ ყოფნის უფლება.
მთავრობის ინიციატივით მომზადებული საარჩევნო კოდექსში შესატანი ცვლილებების პროექტი, პარლამენტში უკვე ინიცირებულია.
მმართველი გუნდი, მათ შორის ადამიანის უფლებათა დაცვის კომიტეტის თავმჯდომარე ეკა ბესელია ამბობს, რომ კანონის გამკაცრებას კეთილშობილური მიზანი აქვს და საარჩევნო პროცესში ძალადობის თავიდან აცილებას ემსახურება.
ნაციონალური მოძრაობის ლიდერი დავით ბაქრაძე საარჩევნო კანონის გამკაცრების საჭოროებას ვერ ხედავს, იგი თვლის, რომ ხელისუფლება ამ ცვლილებებით კორცხელის ინციდენტის გადაფარვას და საერთაშორისო საზოგადოების მოტყუებას ცდილობს.
„ეს არის კორცხელის გადაფარვის მცდელობა და მცდელობა რამენაირად პასუხი გასცენ საერთაშორისო თანამეგობრობიდან და ქართული საზოგადოებიდან მომდინარე კრიტიკას. ის რომ ძალადობაში მონაწილე პირების დასჯა დღევანდელი კოდექსით არ შეიძლება, არის ტყუილი. ჩვენ კარგად გვახსოვს, რომ დეპუტატის პიჯაკის დაზიანებისთვის სამი ახალგაზრდა თვეობით გაუშვეს ციხეში, ამიტომ კოდექსში ყველანაირი მუხლი არსებობს,“-განაცხადა დავით ბაქრაძემ.