დღეს ფეხბურთის ფედერაციასა და სპორტისა და ახალგაზრდობის სამინისტროში კომენტარები გაკეთდა მედიაში გავრცელებულ ინფორმაციაზე, რომელიც ფიფაში აფხაზეთის შესაძლო გაერთიანებას ეხება.
"ჩვენ ფიფასთან გვაქვს კომუნიკაცია ამ საკითხთან დაკავშირებით. მათი პოზიცია, რა თქმა უნდა უცვლელია, რაც შეეხება იმ პიროვნებებს, რომელთაც სოხუმის მხარდამჭერი განცხადებები გააკეთეს გუშინ გამართულ პრესკონფერენციაზე , უბრალოდ FIFA-ში დარეგისტრირებული მატჩის აგენტები არიან და ვერანაირად ვერ იქნებიან FIFA-ს ოფიციალური წარმომადგენლები. შესაბამისად, მათი პოზიცია ვერნაირად ვერ იქნება ჩვენთვის FIFA-ს ოფიციალური პოზიცია.
ჩვენ უკვე დავუკავშირდით FIFA-ს და ვაცნობეთ მათ მიერ კონფერენციაზე გაკეთებული განცხადებების შესახებ", – განაცხადა საქართველოს ფეხბურთის ფედერაციის გენერალურმა მდივანმა დავით მუჯირმა. ფიფაში ამ საკითხზე განსხვავებული პოზიცია აქვთ და კიდევ ერთხელ დაადასტურეს, რომ აღნიშნული პირები არ არიან FIFA-ს ოფიციალური წარმომადგენლები.
შეგახსენებთ, აფხაზეთში 3 დღეა მიმდინარეობს არაღიარებულ ქვეყნებს შორის მსოფლიო საფეხბურთო ჩემპიონატი. გავრცელდა ინფორმაცია, რომ აღნიშნულ ტურნირს ესწრებიან FIFA-ს ოფიციალური წარმომადგენლები დაგ ლარსენი და სერგეი აზიზოვი, . მათ გამართეს პრესკონფერენცია და ისაუბრეს აფხაზეთის FIFA-ში გაწევრიანებაზე. აზიზოვმა განაცხადა, რომ მიმართა FIFA-ს მაღალჩინოსნებს აფხაზეთის გასაწევრიანებლად.
„აფხაზეთი არის ღირსეული ქვეყანა, რომელსაც შეუძლია ფიფა წარმოადგინოს, რადგან მას აქვს თავისი მიწა, ხელისუფლება და საკუთარი ენა. გარდა ამისა არსებობს ფეხბურთის მაღალი ხარისხი. აქ ხალხს უყვარს ფეხბურთის თამაში. ამიტომ ჩვენ უკვე დავიწყეთ მოლაპარაკებები ფიფასთან“, – განაცხადა აზიზოვმა.