აფხაზური მედიის ცნობით, გუშინ სოხუმში გაიმართა FIFA-ს შვედი აგენტის დაგ ლარსონისა და შვედეთში ფედერაციის მატჩ-აგენტის სერგეი აზიზოვის პრესკონფერენცია, სადაც შეფასდა აფხაზეთში მიმდინარე კონიფას ჩემპიონატი და აფხაზეთის შანსები გახდეს FIFA – ს წევრი ქვეყანა.
სერგეი აზიზოვმა, რომელიც შვედეთში საფეხბურთო სფეროში მოღვაწეობს, განაცხადა, რომ აფხაზეთი FIFA-ს წევრობის სურვილს გამოთქვამს და უკვე დაუკავშირდა FIFA-ს ამ თხოვნით.
,,ჩემი აზრით, აფხაზეთი სავსებით იმსახურებს იმას, რომ ფეხბურთის საერთაშორისო ფედერაციის წევრი გახდეს, რამდენადაც აქვს თავისი მიწა, ხელისუფლება, ენა და , რაც მთავარია, – კარგი ფეხბურთი. აფხაზეთში ხალხს უყვარს ფეხბურთი, აქ არაერთი ლეგენდარული ფეხბურთელი აღზრდილა.'' – განაცხადა აზიზოვმა.
დაგ ლარსენმა, რომელიც FIFA-ს მიერ ლიცენზირებულ აგენტთა სიაშია შესული, განაცხადა, რომ კონიფას ჩემპიონატის ჩატარება კარგი განაცხადია იმისათვის, რომ მისმა მისწრაფებამ ფიფა-ში გაწევრიანებისკენ მხარდაჭერა ჰპოვოს. ,,მე ვიცი, რომ ნებისმიერი ქვეყანა, დიდი იქნება ის თუ პატარა, მიისწრაფვის, რომ მთელმა მსოფლიომ გაიცნოს და ამისათვის ფეხბურთი შესანიშნავი საშუალებაა''- განაცხადა მან.
ფედერაციის წარმომადგენლებმა განაცხადეს აგრეთვე, რომ ფიფას ხელმძღვანელობასთან მიმდინარეობს მოლაპარაკებები ფედერაციის ეგიდით ჩატარდეს ამხანაგური მატჩი აფხაზეთის ნაკრების მონაწილეობით.
პრესკონფერენციაში მონაწილეობდა ოკუპირებული აფხაზეთის ვიცე-პრემიერი შამილ არძინბა, რომელმაც მოიშველია კოსოვოს მაგალითი და განაცხადა, რომ ფიფაში აფხაზეთის გაწევრიანება ძალიან აქტუალური საკითხია.
,,სამწუხაროდ, ორმაგმმა სტანდარტებმა ვერც სპორტის ამ სახეობას აუარა გვერდი – კოსოვო ფიფაში მიიღეს ყველა იმ ნორმისა და წესის დარღვევით, რომელთაც ახლა ჩვენთვის უარის სათქმელად იყენებენ, კოსოვოს შემთხვევაში კი არად ჩააგდეს. თუ ჩვენ კარი დაგვიხურეს, ეს იქნება ზეუსამართლობა ყველა თვალსაზრისით – იქნება ეს მორალური, ზნეობრივი თუ პოლიტიკური – განაცხადა არძინბამ.
ფიფას მატჩ – აგენტების ამ განცხადებებზე ფეხბურთის ფედერაციას ამ დრომდე კომენტარი არ გაუკეთებია.