ამ წუთებში ცენტრალური სუპერმარკეტის მიმდებარე ტერიტორიაზე მომუშავე გარემოვაჭრეები საპროტესტო მსვლელობით ქალაქ ზუგდიდის მერიისკენ მიემართებიან. მათ გზის სავალი ნაწილი ნაწილობრივ გადაკეტილი აქვთ. ადგილზე მობილიზებულია სამართალდამცავებიც. რამდენიმე მოვაჭრეს ბენზინი მიაქვს და აცხადებენ, რომ მათი მოთხოვნების შეუსრულებლობის შემთხვევაში თავის დაწვას აპირებენ. მათი განცხადებით, სხვა გამოსავალი არ აქვთ, რადგან გარევაჭრობის აკრძალვის შემთხვევაში ისინი მუშაობას ვერ შეძლებენ. უმუშევრად დარჩენის შემთხვევაში კი ყოველდღიურ სესხებს ვერ გადაიხდიან. გარემოვაჭრეები ქალაქ ზუგდიდის მერთან ირაკლი გოგოხიასთან შეხვედრას ითხოვენ.
გარევაჭრობის ნებართვის მოთხოვნით მოვაჭრეები მეოთხე დღეა აქციებს მართავენ. გუშინ მათ, თბილისი-ზუგდიდის ცენტრალური მაგისტრალი გადაკეტეს რა დროსაც ფიზიკური დაპირისპირება მოხდა აქციის მონაწილეებსა და სამართალდამცავებს შორის.