ბაღების დირექტორების გათავისუფლებები გრძელდება. ამჯერად თანამდებობები 4 სკოლამდელი სასწავლებლის ხელმძღვანელს დაატოვებინეს. ამ შემთხვევაშიც გადაწყვეტილების ოფიციალური მიზეზი ფინანსური გადაცდომა გახდა.
გათავისუფლების ოფიციალურ მიზეზეს არ ეთანხმებიან, როგორც ყოფილი ხელმძღვანელები, ასევე აღსაზრდელების მშობლებიც. 36-ე საბავშვო ბაღში დირექტორის გათავისუფლების გამო მშობლებმა პროტესტი გამოთქვეს. მშობლების თქმით, დირექტორი დაკისრებულ მოვალეობას კარგად ართმევდა თავს. მათი თქმით, ყველაფერს გააკეთებენ, რომ ახალი დირექტორი შენობაში არ შეუშვან.
თბილისის 36-ე საბავშვო ბაღში ბაღების მართვის სააგენტოს წარმომადგენლები იმყოფებიან. ისინი არ საუბრობენ საბავშვო ბაღის დირექტორის ელზა უდესიანის დირექტორის თანამდებობიდან გათავისუფლების მიზეზების შესახებ. თავად ელზა უდესიანი თბილისის მერიის ამ გადაწყვეტილებას პოლიტიკურ მოტივებს უკავშირებს. იგი აცხადებს, რომ მას უსაფრთხოების სამსახურის წარმომადგენელი რამდენჯერმე დაუკავშირდა და დაკითხა. უდესიანის თქმით, მათი დაკვეთით ხდება მათთვის არასასურველი დირექტორების გათავისუფლება.
„ეს არის პოლიტიკური დაკვეთა, სახელმწიფო მანქანა ებრძვის გია უდესიანს, ვინაიდან ვარ გია უდესიანის და, შერჩევით მოხდა ამ ფინანსური დოკუმენტაციის გაწვევაც,“– ,,გია უდესიანის წინააღმდეგ დღეს არნახული ბინძური ბრძოლა გააჩაღეს, როგორც კი მისი სურვილი, მონაწილეობა მიეღო მესტიიდან მომავალ საპარლამენტო არჩევნებში, ცნობილი გახდა გარკვეული სახელისუფლებო წრეებისთვის'' – განაცხადა ელზა უდესიანმა.