“გემშვიდობებით როგორც ჟურნალისტი და შეგხვდებით როგორც პოლიტიკოსი” – მერაბ მეტრეველი პოლიტიკაში მიდის

0
23609

ჟურნალისტი მერაბ მეტრეველი პოლიტიკაში მიდის. განცხადება ამის შესახებ თავად ჟურნალისტმა "კვირის პალიტრის" საკუთარ რუბრიკაში "მერაბ მეტრეველის კვირის ფიქრები" გააკეთა, სადაც ის დაახლოებით 8 წლის განმავლობაში მუშაობდა. მერაბ მეტრეველის განცხადებას უცვლელად გთავაზობთ:

”პროფესიას ვიცვლი! ჟურნალისტიკას ვემშვიდობები და ვემშვიდობები”კვირის პალიტრის” მკითხველსაც. ეს არ იყო იოლი გადაწყვეტილება. უპირველესად იმიტომ, რომ იმას ანებებ თავს, რასაც ამდენი ხანი აკეთებდი, ყველაფერს ცვლი და ახალ საქმეს იწყებ. კიდევ იმიტომ, რომ საქართველო, ალბათ, ერთადერთი ქვეყანაა, სადაც ადამიანი შეიძლება მხოლოდ იმიტომ გალანძღონ, რომ პოლიტიკაში წავიდა. პოლიტიკოსობა ჩვენს ქვეყანაში ცუდთან ასოცირდება. ”აუ, რა უნდა, თავს რატომ იფუჭებს?!”, ”პოლიტიკა ბინძური საქმეა!”. იცით, რატომ არის პოლიტიკა ბინძური საქმე? იმიტომ, რომ პატიოსანი და ღირსეული ადამიანები თქვენსავით ფიქრობენ და პოლიტიკაში არ მიდიან, შედეგად კი ასპარეზი სხვებს რჩებათ. ჩემი აზრით, პოლიტიკაში უნდა წავიდეს ის, ვისაც გული ერჩის და ფიქრობს, რომ შეუძლია, ქვეყნისთვის სასიკეთო საქმე აკეთოს. ეს არარის პათეტიკა, ეს სურვილია.

პაატა ბურჭულაძესაც იმავეს საყვედურობენ – კარგი მომღერალია, ქველმოქმედი, ყველას უყვარს, რაუნდა პოლიტიკაშიო… ყველა გაიძახის, მოგვბეზრდა ერთიდაიგივე ხალხი, ახალი სახეები სჭირდება პოლიტიკასო და თუ ვინმე გამოჩნდა, მაშინვე ვეტაკებით – რა გინდა პოლიტიკაშიო. იქნებ გავარკვიოთ, ბოლოს და ბოლოს, რა გვინდა.

რაც შეეხება ”ოცნების” გავრცელებულ მითს, რომ ბურჭულაძე ”ნაციონალების” სატელიტია, გული მწყდება, რომ ”ოცნება” ”ნაციონალებს ჰბაძავს და ცდილობს, მათგან ყველანაირი სიგლახე ისწავლოს. ეს ერთ-ერთი მიზეზია, რის გამოც ეს პარტია არ მომწონს. უაპელაციოდ იარლიყების მიწებება, კონკურენტის ვიღაცის აგენტად გამოცხადება ”ნაციონალების” მეთოდი იყო. ასე მოიქცნენ ისინი, როდესაც ივანიშვილი გამოჩნდა პოლიტიკაში. მას პუტინის სატელიტის იარლიყი მიაწებეს… ასე რომ, ზღაპრებს ნუ დაიჯერებთ. ჩემი ადგილი არასდროს იქნება ”ნაციონალების” გვერდით… 

გემშვიდობებით როგორც ჟურნალისტი და შეგხვდებით როგორც პოლიტიკოსი. იმედია, ყველაფერი გამომივა”, – აღნიშნავს მერაბ მეტრეველი.

მერაბ მეტრეველს, როგორც მოძრაობა ”სახელმწიფო ხალხისთვის” წევრს, პაატა ბურჭულაძე, სავარაუდოდ, დღეს წარადგენს.

წინა სტატიავინ იქნება ენმ – ის გამსვლელ სიაში ზუგდიდის ორგანიზაციის მიერ წარდგენილი კანდიდატებიდან?
შემდეგი სტატიაირაკლი ალასანია: ,,თბილისის საქალაქო სასამართლოს დღევანდელი გადაწყვეტილება ამ რეჟიმის დასრულების დასაწყისი იქნება”
ტელეკომპანია ოდიშის საინფორმაციო სამსახური