ლტოლვილთა დანიის საბჭომ საგრანტო კონკურსში გამარჯვებული მცირე და საშუალო მეწარმეების ბიზნეს აღჭურვილობის გადაცემის ცერემონიალი გამართა.
ლტოლვილთა დანიის საბჭო (DRC) საქველმოქმედო ჰუმანიტარულ ცენტრ „აფხაზეთთან“ (CHCA) პარტნიორობით და ევროკავშირის (EU) ფინანსური ხელშეწყობით 2015-2016 წწ. ახორციელებს მასშტაბურ პროექტს „დამოკიდებულებიდან თვითკმარობამდე – ინოვაციური და ეფექტური საარსებო წყაროების გადაწყვეტილებები საქართველოსთვის”. პროექტის მიზანია იძულებით გადაადგილებული და მასპინძელი თემების ეკონომიკური ინტეგრაციის ხელშეწყობა გრძელვადიანი და მდგრადი საარსებო წყაროების შესაძლებლობების უზრუნველყოფის გზით. პროექტი საქართველოს 5 ქალაქში ხორციელდება: ქუთაისი, წყალტუბო, ფოთი, ზუგდიდი, ბათუმი.
სამეგრელოს რეგიონში ლტოლვილთა დანიის საბჭოს მიერ გამოცხადებულ საგრანტო კონკურსში მცირე და საშუალო მეწარმეებმა მიიღეს მონაწილეობა. გამარჯვებულ ბიზნეს წინადადების ავტორებს ორგანიზაციამ ბიზნესის განსავითარებლად თითოეულს 4000 ევროს ღირებულების ინვენტარი გადასცა. 18-ივე მეწარმე ამჟამად ბიზნესს სამეგრელოს ტერიტორიაზე აწარმოებს. მიღებული აღჭურვილობა ხელს შეუწყობს მათი ბიზნესისა და საარსებო წყაროების ზრდას.