„თავისუფალი დემოკრატების“ წევრის ზურაბ აბაშიძის განცხადებით, მისი პარტია მზადაა იმისთვის რომ საარჩევნო სისტემის გაუმჯობესებას მხარი დაუჭირონ. აბაშიძის თქმით არსებული სისტემა კრიტიკას ვერ უძლებს:
„ჩვენ მზად ვართ იმისთვის, რომ გავაკეთილშობილოთ დღევანდელი სისტემა რომელიც კრიტიკას ვერ უძლებს. ეს იქნება გერმანული მოდელი თუ მრავალმანდატიანი მაჟორიტარული სისტემა , ჩვენ ნებისმიერ საკითხთან მიმართებაში ვართ აბსოლუტურად ღია და მზად ვართ განვიხილოთ.- ზურაბ აბაშიძე.
საქართველოს პარლამენტში საარჩევნო სისტემის ცვლილებასთან დაკავშირებით ოპოზიციური პოლიტიკური გაერთიანებების მიერ შემუშავებული პროექტის განხილვა მიმდინარეობს, რომელიც პარლამენტს 200 ათასი ხელმოწერის საფუძველზე წარედგინა.
პროექტის მიხედვით, გათვალისწინებულია პარლამენტის დაკომპლექტება ერთიანი პროპორციული სისტემით არჩეული და სამხარეო პროპორციული სისტემით არჩეული პარლამენტის წევრებისგან. ოპოზიციის საკონსტიტუციო ცვლილებები 2016 წლის არჩევნებისთვის 75 სადეპუტატო მანდატის – პროპორციული წესით, ხოლო 75-ის სამხარეო-პროპორციული წესით გადანაწილებას გულისხმობს.
საკონსტიტუციო ცვლილებების პროექტს დეპუტატებს „ახალი მემარჯვენეების“ ლიდერი მამუკა კაციტაძე აცნობს.