IRI-ს მიერ ჩატარებული კვლევა სხვა საკითხებთან ერთად ქვეყნის განვითარების შესახებ გამოკითხულთა პოზიციასაც ასახავს.
კითხვაზე, როგორი მიმართულებით ვითარდება ქვეყანა, პასუხები ასე გადანაწილდა:
გამოკითხულთა 16%-ს მიაჩნია, რომ ქვეყანა სწორი მიმართულებით ვითარდება. 13%-მა არ იცის შეკითხვის პასუხი, რესპონდენტების უმრავლესობა, 70% კი მიიჩნევს, რომ ქვეყანა არასწორი მიმართულებით ვითარდება.
კვლევის თანახმად გამოკითხულთა 65% თვლის, რომ ქვეყანაში მდგომარეობა გაუარესდა. კვლევამ ასევე დაადგინა ეროვნული პრობლემების პირველი სამეული, რომელიც უცვლელი რჩება, ესენია: უმუშევრობა, ეკონომიკური მდგომარეობა და ტერიტორიული მთლიანობა.
გამოკითხული მოსახლეობა ეკონომიკის ძირითად პრობლემებად შემდეგ ფაქტორებს ასახელებს:
84%-ს მიაჩნია, რომ ყველაზე მთავარი პრობლემა ლარის კურსია. 52%-ის აზრით ეს კომუნალური გადასახადებია, 41% ამ მიმართულებით გადასახადებს ასახელებს, 28% კი თვლის, რომ ეკონომიკის პრობლემების სათავე არაკომპეტენტურობაა.
IRI-ის მიერ ჩატარებული ახალი კვლევის ფარგლებში გამოკითხულებს რუსთავი 2-ის გარშემო მიმდინარე პროცესებიც შეაფასებინეს. გავრცელებული ინფორმაციით კითხვაზე – იყო თუ არა რუსთავი 2-ის წინააღმდეგ მიმდინარე საქმე პოლიტიკურად მოტივირებული – გამოკითხულთა უმრავლესობამ, 54 %-მა დადებითი პასუხი დააფიქსირა და აღნიშნა, რომ პროცესი პოლიტიკურად მოტივირებულია.