არჩევნების თარიღი პრეზიდენტმა დაასახელა და ახლა ჯერი პრემიერმინისტრზეა, რომელმაც დოკუმენტს ხელი უნდა მოაწეროს. საპარლამენტო არჩევნები სავარაუდოდ 8 ოქტომბერს გაიმართება.
პროცედურები ჯერ არ დასრულებულა, თუმცა ხელისფლებამ უკვე დაიმსახურა ოპოზიციის კრიტიკა. მათ პრეტენზიები აქვთ გიორგი მარგველაშვილთან და აცხადებენ, რომ აუცილებელი იყო გარკვეული სახის კონსულტაციები ოპოზიციასთან. „მას არ ქონდა კონსულტაციები პარტიებთან და ეს თარიღი გამოცხადდა, როგორც ჩანს პრემიერმინისტრისა და ქართული ოცნების წარმომადგენელთა თათბირის შემდეგ,“ – აცხადებს ნაციონალური მოძრაობის წევრი აკაკი მინაშვილი.
ოპოზიციას საკუთარ შანსებში ეჭვი არ ეპარება, თუმცა აცხადებენ, რომ თუ არ შეიცვალა კანონმდებლობა და არ იქნა გათვალისწინებული ვენეციის კომისიის შენიშვნები, მეორე ტური გარდაუვალია. განსაკუთრებით უკმაყოფილო მიმდინარე პროცესებით არასაპარლამენტო ოპოზიციაა, რომელიც საარჩევნო კანონმდებლობის რეფორმირების საკითხზე მმართველ გუნდთან ჯერ კიდევ მოლაპარაკებებს აწარმოებს.
საქართველოს ევროპელი დემოკრატების თავმჯდომარეს პაატა დავითაია თვლის, რომ თუ ეს სისტემა დარჩა და საარჩევნო კოდექსში არ განხორციელდა ცვლილებები, ყველას გაუჭირდება 50 პროცენტიანი ბარიერის აღება პირველ ტურში. იგი აცხადებს, რომ მაღალი ბარიერის გამო, ,,მეორე ტურის ალბათობა ძალიან დიდია გარკვეულ ოლქებში, რაც აწყობს ხელისუფლებას“
გაერთიანებული დემოკრატიული მოძრაობის პოლიტიკური მდივანი გიგლა ბარამიძე აცხადებს, რომ პარტია მზად არის არჩევნებში მონაწილეობისთვის. „მუცლით მეზღაპრეობის კვირეული დამთავრდა და გადავდივართ უკვე საქმეზე, უკვე გამოცხადდა არჩევნების თარიღი. ქვეყანა არ დაქცეულა, მეორედ მოსვლა არ არის, პრინციპში, ჩვენ ველოდით, რომ ოქტომბერში იქნებოდა არჩევნები და ამისთვის ჩვენ მზად ვართ,“ – აცხადებს იგი.
პოზიცია არაერთგვაროვანია მედიასა და საზოგადოებაშიც. ტელეკომპანია ,,რუსთავი 2 '' გენერალური დირექტორი ნიკა გვარამია თვლის, რომ არჩევნების დანიშვნით ოქტომბრის დასაწყისში ქვეყანას საარჩევნო კამპანიის მთელი ერთი თვე წაართვეს. ,,ეს არ არის სახელმწიფოებრივი და
პასუხისმგებლიანი მიდგომა – არა აქვს თქვენთვის მნიშვნელობა, ინფორმირებულ არჩევანს გააკეთებს ელექტორატი, თუ ბრმას? წინასაარჩევნო კამპანია იწყება არჩევნებამდე 60 დღით ადრე. აგვისტო მკვდარი თვეა და ყველას ცხელა, ოღონდ არა არჩევნებისთვის. სხვას რომ თავი დავანებოთ, ურბანული ცენტრები დაცლილია და საარჩევნო კამპანიაშიც ვერ მიიღებს ამომრჩეველი მონაწილეობას. ტელევიზია აგვისტოში ისვენებს, ყურებადობა დაბალია 15 სექტემბრამდე. შესაბამისად, მხოლოდ სექტემბრის ნახევარი გვაქვს დებატების და პარტიების პრეზენტაციებისთვის, რაც არარეალურად მცირე დროა. '' – მიმართავს იგი გიორგი მარგველაშვილს.
Read more: http://www.tzona.org/post/ratom-dainishna-archevnebi-8-oktombers#ixzz452mDvCY4