მთიან ყარაბაღში ვითარება ამ დრომდე დაძაბულია. დღეს დილის 6 საათიდან მთიანი ყარაბაღის აზერბაიჯანის კონტროლირებადი ტერიტორიაზე ინტენსიური შეტაკებები განახლდა.  აზერბაიჯანი და სომხეთი ცეცხლის შეწყვეტის ზავის დარღვევაში კვლავ ერთმანეთს ადანაშაულებენ. არაღიარებული რესპუბლიკის თავდაცვის უწყებაში აცხადებენ, რომ მათი პოზიციების მიმართულებით აზერბაიჯანელმა სამხედროებმა ცეცხლი გახსნეს. ადგილობრივები კი ცეცხლის გახსნაში სომეხ ჯარისკაცებს ადანაშაულებენ. პოლიციას კონტროლი გამკაცრებული აქვს და, ფაქტობრივად, მედიის წარმომადგენელებს ადგილზე მუშაობის უფლებას არ აძლევენ, ამიტომ ცნობები დაღუპულთა და დაშავებულთა შესახებ წინააღმდეგობრივია და დაზუსტება ჭირს.

ოფიციალური ბაქო ადასტურებს, რომ გასული 24 საათის განმავლობაში ფრონტის ხაზზე 3 ჯარისკაცი დაკარგა. სომხური მხარე კი ირწმუნება, რომ მსხვერპლი აზერბაიჯანის მხარეს გაცილებით დიდია და ის 21-ს აღწევს. ამის მტკიცებულებად ერევანი უპილოტო საფრენი აპარატის მიერ გადაღებულ ვიდეო მასალას ავრცელებს.ერთ-ერთი აზერბაიჯანული ტელეარხის ეთერში კი, კონფლიქტის ზონაში დრონის ჩამოგდების კადრები უჩვენეს. ბაქოში აცხადებენ, რომ აპარატი სომხეთს ეკუთვნოდა. 

ამასობაში კი გაერო მთიან ყარაბაღში ბოლო ორი დღის მანძილზე  მიმდინარე  საბრძოლო მოქმედებების შედეგების  მონაცემებს აქვეყნებს. ორგანიზაციის ცნობით, დაპირისპირებას  33 ადამიანი, მათ შორის 3 მშვიდობიანი მოქალაქე ემსხვერპლა, 200-ზე მეტი კი დაშავდა.