ზუგდიდის მუნიციპალიტეტის საკრებულოს წევრი და საფეხბურთო გუნდ "ოდიში 1919" -ის გენერალური მენეჯერი დაკავებული თანამდებობიდან გაათავისუფლეს, ხოლო მისი შტატი კი გააუქმეს. ამის შესახებ განცხადება თავად მალხაზ ჭეჟიამ მუნიციპალიტეტის საკრებულოს დღევანდელ სხდომაზე გააკეთა. მისი თქმით, სამსახურიდან გათავისუფლების ოფიციალური ბრძანება ჯერ არ მიუღია, თუმცა გუშინ, 31 მარტს ამის შესახებ საკრებულოს თავმჯდომარემ ლაშა გოგიამ სიტყვიერად აცნობა. მალხაზ ჭეჟიას განცხადებით, მისთვის გაუგებარია მენეჯერის გათავისუფელება, მაშინ როცა გუნდი წარმატებით მოღვაწეობს პირველ ლიგაში და ჩატარებული 8 თამაშიდან 6 მოგება აქვს. გაკეთებულ განცხადებას სიტყვიერი დაპირისპირება მოჰყვა მალხაზ ჭეჟიასა და ზუგდიდის მუნიციპალიტეტის საკრებულოს თავმჯდომარე ლაშა გოგიას შორის.
გუნდის გენერალური მენეჯერობიდან გათავისუფლების მიზეზებზე მალხაზ ჭეჟია არ საუბრობს, რადგან, მისი თქმით, მას არ აქვს ინფორმაცია ამის შესახებ, თუმცა ლაპარაკობს გავრცელებულ ხმებზე.
მალხაზ ჭეჟიას განცხადებით, აღნიშნული გადაწყვეტილებით, გუნდის წინსვლა დასრულებულია, რადგან ფეხბურთელებს მოტივაცია აღარ ექნებათ.
ხმაურიანი სხდომის დასასრულს გაკეთებულ განცხადებაზე კომენტარი ზუგდიდის მუნიციპალიტეტის საკრებულოს თავმჯდომარემ გააკეთა. ლაშა გოგიას განცხადებით, გუნდი ჩვეულებრივ რეჟიმში გააგრძელებს მუშაობას წარმატების მისაღწევად.
რაც შეეხება შტატის გაუქმებას, ლაშა გოგიას განცხადებით, კომპეტენციის ფარგლებიდან გამომდინარე მან ამის შესახებ არაფერი იცის.