ქალაქ ზუგდიდის საკრებულოს დღევანდელ სხდომაზე ფრაქცია "ერთიანმა ნაციონალურმა მოძრაობამ" მოხსენება წარადგინა. ანა წითლიძის განცხადებით, ადგილობრივმა ხელისუფლებამ ზუგდიდის ცენტრალური სუპერმარკეტის ტერიტორიაზე მომუშავე ადამიანების პრობლემა ყურადღების გარეშე დატოვა. დეპუტატმა ასევე ქალაქის ტერიტორიაზე ტროტუარებზე ქვაფენილების დამგები მუშების სახელფასო დავალიანების შესახებაც ისაუბრა და აღნიშნა, რომ საკითხი ამ დრომდე გადაუჭრელია. ანა წითლიძის მოხსენებაში მოხვდა ასევე ნგრევის პირას მყოფი ზუგდიდის თეატრი. მისი თქმით, არაერთი დაპირების მიუხედავად პრობლემა მოუგვარებელია. აღნიშნული მოხსენების წარდგენას უმცირესობის დეპუტატსა და საკრებულოს თავმჯდომარეს შორის კამათი მოჰყვა. მერაბ ქვარაიამ ანა წითლიძის მიერ გამოთქმული შენიშვნები არ გაიზიარა და ოპოზიციური ფრაქციის წარმომადგენელი საკითხის პოლიტიკურ მანიპულირებაში დაადანაშაულა. პასუხად ანა წითლიძემ მერაბ ქვარაია პოპულისტური განცხადებების გაკეთებაში დაადანაშაულა.
სხდომის დასასრულს ქალაქ ზუგდიდის საკრებულოს თავმჯდომარემ მედიასთან კომენტარი გააკეთა. მერაბ ქვარაიას განცხადებით, კრიტიკა მისაღებია, თუმცა ის რეალური უნდა იყოს.
საკრებულოს დღევანდელ სხდომაზე გარდა ნაციონალური მოძრაობის ფრაქციის მოხსენებისა, დეპუტატებმა სხვა საკითხებზეც იმსჯელეს.