ასწლოვანი ტიტა ხე როგორც იქნა კარჭაპიდან გადაიტანეს ზღვაში ვაივაგლახით გაყვანილ გზაზე . ამ დროისათვის ხე ხმელეთამდე არ მისულა, თუმცა მისი გადატანის პროცესი დაწყებულია. სამუშაოების მწარმოებელი კომპანია "ზიმო" ვარაუდბს, რომ ხის ხმელეთზე გადატანა დღის ბოლოსთვის გახდება შესაძლებელი.
ხის გადმოტანა მეოთხე დღეა მიმდინარეობს. კომპანიის განცხადებით, სამუშაოებს ხელს უშლიდა ზღვის მოქცევა და უამინდობა. თავდაპირველად, კარჭაპის ნაპირამდე მისატანად ნაპირის ჩაღრმავების სამუშაოები მიმდინარეობდა, შემდეგ კი საამისოდ გზის მიყვანა დაიწყეს. ადგილზე ათამდე სპეცტექნიკა მუშაობს. გზა, რომელიც ერთხელ გაიყვანეს, ზღვამ წაიღო, რის შემდეგაც მეორე გზა აეროპორტის ასაფრენი ბილიკების ფილებით ააგეს.
დღე იწურება, ხე კი ისევ კარჭაპზე, წყალში დგას. როგორც სოციალურ ქსელებში წერენ, ხეს ჯერ კიდევ შეიძლება ეშველოს და კვლავ მყარად დადგეს მიწაზე, მაგრამ, რაც შეეხება ხელისუფლებას, რომელიც არაფორმალური მმართველის ახირებას არის აყოლილი, უიმედოდ აქვს წყალი შეყენებული, რასაც თუნდაც ამ ხის უთავბოლო იძულებითი მოგზაურობა მოწმობს.