ესპანეთში მომხდარი ავტოსაგზაო შემთხვევის შედეგად დაშავებულ სტუდენტთა შორის საქართველოს მოქალაქეები არ არიან – ინფორმაცია ამის შესახებ საქართველოს წარმომადგენლობამ კატალონიის პოლიციის დეპარტამენტიდან მიიღო.
საქართველოდან ესპანეთში ერასმუსის სტუდენტური გაცვლითი პროგრამით თსუ-დან 3 ქართველი სტუდენტი იმყოფება. უკვე ცნობილია, რომ არც ერთი მათგანი შემთხვევის ადგილზე არ იმყოფებოდა.
მედიის ინფრომაციით, დაშავებულები დიდი ბრიტანეთის, ნორვეგიის, თურქეთის, უკრაინისა და ესპანეთის მოქალაქეები არიან. დაღუპული სტუდენტების ვინაობა ჯერჯერობით უცნობია. პოლიციის ინფორმაციით, ავტობუსში გაცვლითი პროგრამა "ერასმუსის" სტუდენტები იმყოფებოდნენ, რომლებიც ბარსელონას უნივერსიტეტში და ბარსელონას ავტონომიურ უნივერსიტეტში ირიცხებიან.
ესპანეთის სამეფოს შსს-ს ინფორმაციით, ავარია ადგილობრივი დროით 06:00 საათზე, ქალაქ ამპოსტასთან მოხდა. ავარიის შედეგად 14 უცხოელი სტუდენტი დაიღუპა. ავტობუსის მძღოლმა, რომელსაც 56 სტუდენტი ვალენსიადან ბარსელონაში გადაჰყავდა, მაგისტრალზე საჭე ვერ დაიმორჩილა, გზის მეორე მხარეს გადავიდა და მსუბუქ ავტომობილს შეეჯახა. 43 დაშავებული საავადმყოფოშია გადაყვანილი.