მოძრაობა „ეს შენ გეხება“ საქართველოს მასშტაბით ფარული თვალთვალის წინააღმდეგ დღეს საპროტესტო მსვლელობას გამართავს. აქცია ქვეყნის მასშტაბით 13 საათზე დაიწყება. ორგანიზატორები მოქალაქეებს მოუწოდებენ მიიღონ აქციაში მონაწილეობა.
"ვიკრიბებით, რათა გავაპროტესტოთ ის, რაც ხდება დღეს ქვეყანაში ფარული ჩანაწერების კადრების გავრცელებასთან დაკავშირებით. გვაქვს რამდენიმე მოთხოვნა. პირველი არის ეფექტური გამოძიების წარმოება და გამოძიებაში საერთაშორისო ექსპერტების ჩართვა. მეორე არის იმ კანონმდებლობის შეცვლა, რაც დღეს ხდება და სამართალდამცველებს აქვთ უფლება კონტროლის გარეშე უთვალთვალონ მოქალაქეებს. და მესამე– დამოუკიდებელი საგამოძიებო ორგანოს შექმნა, რომელიც გამოიძიებს სამართალდამცავი ორგანოების მიერ კანონდარღვევებს, რათა დაუსჯელობის სინდრომი აღარ არსებობდეს", – განაცხადა "საერთაშორისო გამჭვირვალობა – საქართველოს" აღმასრულებელმა დირექტორმა ეკა გიგაურმა.
მსვლელობას უერთდება ზუგდიდიც. ფარული თვალთვალის წინააღმდეგ აქცია ცენტრალური ბულვარის ტერიტორიაზეა დაგეგმილი. „დღეს, ჩვენ ისევ უნდა გავერთიანდეთ პირადი ცხოვრების ხელშეუხებლობის და პიროვნული თავისუფლების დასაცავად“ – ნათქვამია მოძრაობის მიერ გავრცელებულ განცხადებაში.