ზუგდიდში დღეს "მეტრო ჯორჯიას" წინააღმდეგ დედაქალაქის მიმართულებით მოძრავი ავტობუსებისა და მიკროავტობუსების მძღოლების საპროტესტო აქციაზე განვითარებულ მოვლენებს პარლამენტის ფრაქცია "თავისუფალი დემოკრატების" თავმჯდომარე გამოეხმაურა. ტელეკომპანია "პირველის" პირდაპირ ეთერში, ვახო სანაიას საავტორო გადაცემაში სტუმრობისას ირაკლი ჩიქოვანმა ადგილობრივი ხელისუფლების წარმომადგენლებს და სამეგრელო-ზემო სვანეთის გუბერნატორს მოუწოდა, ყველაფერი გააკეთონ იმისთვის, რომ დაპირისპირებულ მხარეებს შორის შედგეს მოლაპარაკება.
"დღეს ძალიან მძიმე ვითარებაა ზუგდიდში, პირდაპირ დაუპირისპირდნენ 140 ინდივიდუალურ მეწარმეს, რომელთაც სერიოზული პრობლემა აქვთ და პრობლემა აქვთ იმის, რომ შესაძლოა ხვალ და ზეგ ვერ არჩინონ საკუთარი ოჯახი. არ მინდა, რომ ჩემი განცხადება განხილულ იქნას როგორც პოლიტიკური განცხადება, ან განხილულ იქნას პოლიტიკური ნიშნის მოგებით – ეს არის გულშემატკივარი ადამიანის განცხადება.
მე დავიბადე და გავიზარდე ზუგდიდში და გული მტკივა, როდესაც ვხედავ ასეთ კადრებს. ეს არის შედეგი იმისა, რომ ზოგიერთ ადგილობრივი თვითმმართველობის წარმომადგენელს არა აქვს რეალური წარმოდგენა თუ რა ხდება ზუგდიდში. არის აბსოლიტურად უგულოდ განწყობილი, ერთ მხარესაა მომართული, ერთ მხარეს უცხადებს საკუთარ მხარდაჭერას და აბსოლიტურად არ ითვალისწინებს ამ ადამიანების ინტერესებს.
სავსებით შესაძლებელია მშვიდად შედეგის მიღწევა და ამისთვის საჭიროა მოლაპარაკება და ამ მოლაპარაკებაში მთავარი როლი უნდა იტვირთოს ადგილობრივმა თვითმმართველობამ და გუბერნატორმა, რომელიც არის პრემიერ-მინისტრის წარმომადგენელი. მე მივმართავ ყველას, რომ მაქსიმუმი გააკეთონ იმისთვის, რომ ასეთი კადრები ზუგდიდიდან არ მოდიოდეს" – განაცხადა ტელეკომპანია "პირველის" პირდაპირ ეთერში, ვახო სანაიას საავტორო გადაცემაში სტუმრობისას პარლამენტის ფრაქცია "თავისუფალი დემოკრატების" თავმჯდომარემ ირაკლი ჩიქოვანმა.