ზუგდიდში ოფიციალური ვიზიტით იმყოფება დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიანი ელჩი საქართველოში ალექსანდრა მერი ჰოლი . ელჩს ზუგდიდის მერიაში უმასპინძლეს. შეხვედრაში ზუგდიდის მერთან ერთად ქალაქის საკრებულოს თავმჯდომარე მერაბ ქვარაია და თავმჯდომარის მოადგილე გიორგი თოდუა მონაწილეობდნენ.
მერიის პრესსამსახურის ინფორმაციით, მერი ჰოლს ზუგდიდში განხორციელებული, მიმდინარე და დაგეგმილი საქმიანობები გააცნეს, შეხვედრაზე განხილულ იქნა ადგილობრივი თვითმმართველობის პრიორიტეტები და თანამშრომლობის გზები.
მერი ჰოლ ჰოლი დაესწრება ქალაქ ზუგდიდის მუნიციპალიტეტის საკრებულოს საანგარიშო სხდომას, რომელზედაც საკრებულოს წინაშე ერთწლიანი მუშაობის ანგარიშით წარსდგებიან საკრებულოს თავმჯდომარე, თავმჯდომარის მოადგილე, ფრაქციებისა და კომისიების წარმომადგენლები. სხდომას მოქალაქეები, არასამთავრობო ორგანიზაციებისა და მედიის წარმომადგენლებცი დაესწრებიან.
13:30 საათზე უცხოელი დიპლომატი ზუგდიდის დემოკრატიული ჩართულობის ცენტრში ადგილობრივი მედიის წარმომადგენლებს შეხვდება.
ვიზიტის ფარგლებში ელჩმა ევროკავშირის სადამკვირვებლო მიის თანამშრომლებთან ერთად ენგურჰესი და ადმინისტრაციული საზღვარი დაათვალიერა, იგი ეწვია აგრეთვე ფერმერებს და დაათვალიერა ევროკავშირის მხარდაჭერით გამართული სასათბურე მეურნეობები.