ცოტა ხნის წინ დედაქალაქის მიმართულებით მოძრავი ავტობუსებისა და მიკროავტობუსების მძღოლებმა შეხვედრა მოითხოვეს და ხვალინდელ აქციაზე დასწრება სთხოვეს ქ.ზუგდიდის მუნიციპალიტეტის საკრებულოს წევრს ფრაქცია "ერთიანი ნაციონალური მოძრაობიდან" ანა წითლიძეს. ამის შესახებ დეპუტატი საინფორმაციო სააგენტო OdishiNews ესაუბრა.
ანა წითლიძე სამარშრუტო ტაქსის მძღოლებს უკვე შეხვდა და დაპირდა რომ ხვალ მათ მიერ გამართულ მშვიდობიან აქციაზე მათთან ერთად იქნებოდა. ის ასევე აღნიშნული საკითხით დაინტერესებას დაპირდა მძღოლებს და სთხოვა მათ მოლაპარაკების რეჟიმში გადაეყვანათ მათი პროტესტი. წითლიძეს განცხადებით მნიშვნელოვანია, რომ აღნიშნული საკითხის მოგვარებაში მოიძებნოს კომპრომისი, ერთს მხრივ მნიშვნელოვანია ჯანსაღი კონკურენციის არსებობა ბაზარზე, მეორეს მხრივ მნიშვნელოვანია ისიც რომ ადამიანის უკან დგანან ოჯახები, მათ აქვთ სესხები და სახელმწიფო ვალდებულია მათ შეუქმნას მუშაობის შესაბამისი პირობები. დეპუტატის განცხადებით, ის უკვე ელაპარაკე მძღოლებს და ისინი მზად არიან თვითონ დააწესონ გარკვეული შეღავათები და გააუმჯობესონ პირობები.
შეგახსენებთ, რომ 17 მარტიდან სატრანსპორტო კომპანია "მეტრო ჯორჯია" დედაქალაქის მიმართულებით რეისებს განაახლებს. როგორც კომპანიის ოფიციალურ ფეისბუქგვერდზეა მითითებული პირველი რეისი დილის 8 საათიდან შესრულდება. ვრცელდება ინფორმაცია, რომ დედაქალაქის მიმართულებით მოძრავი ავტობუსებისა და მიკროავტობუსების მძღოლები საპროტესტო აქციის გამართვას გეგმავენ "მეტრო ჯორჯია" -ს წინააღმდეგ.