საფეხბურთო კლუბი ზუგდიდის "ზუგდიდი" საქართველოს პირველობის მე -20 ტურის მატში თბილისის "დინამოსთან" ანგარიშით 2:3 დამარცხდა. ზუგდიდურმა გუნდმა დედაქალაქელებს სამტრედიაში, ეროსი მანჯგალაძის სახელობის სტადიონზე გაუმასპინძლდა.
მთელი შეხვედრა მაღალ ტემპში მიმდინარეობდა. პირველი გოლი დინამოელებმა მე -18 წუთზე გაიტანეს – ალექსანდრე იაშვილმა ოთარ კიტეიშვილთან გაითამაშა კუთხური. ამ უკანასკნელმა საჯარიმოში ჩააწოდა ბურთი, ყველას ბაჩანა არაბულმა დაასწრო და თავური დარტყმით გოლი გაიტანა. ზუგდიდელებმა წონასწორობის აღდგენა 31 -ე წუთზე შეძლეს, სოსო მალანიამ საჯარიმო დარტყმით აღადგინა წონასწორობა. შეხვედრის პირველი ნახევარი ამ ანგარიშით დასრულდა.
მეორე ტაიმის 52 -ე წუთზე სტუმრები ზაზა ჭილაძის გოლით დაწინაურდნენ, რომელსაც 66 -ე წუთზე შეცვლაზე შემოსული იური შეველის საპასუხო გოლი მოჰყვა და თანაფარდობა კვლავ აღდგა.
მატჩის 70 -ე წუთზე ჯაბა ჯიბღაურმა ძლიერი დარტყმით ზუგდიდელთა კარში მესამე და გადამწყვეტი გოლი გაიტანა. საბოლოოდ, დინამოელებმა დაძაბულ შეხვედრაში ანგარიშით 3:2 იმარჯვეს.
სატურნირო მონაცემებით, ამ დროისთვის თბილისის დინამო 55 ქულით ლიდერობს და 14 ქულით უსწრებს უახლოეს მდევარს გორის დილას. ზუგდიდის "ზუგდიდი" ჩატარებული 20 შეხვედრიდან 9 ქულით ცხრილის მე -15 ადგილზე იმყოფება.