ზუგდიდის შალვა დადიანის სახელობის სახელმწიფო დრამატულ თეატრში უმძიმესი მდგომარეობაა. ორი დღის წინ კულტურულ დაწესებულებაში დირექციის მისაღებ ოთახში ჭერი ჩამოინგრა. არსებული მდგომარეობის ამსახველი ფოტოები თეატრის ადმინისტრაციამ სოციალურ ქსელ Facebook -ის გვერდზე განათავსა. ამჟამად თეატრში თეატრალური წარმოდგენები შეწყვეტილია, მსახიობთა დასი შენობის ავარიული მდგომარეობის გამო წარმოდგენებს ვერ მართავს. ბოლო სპექტაკლი ზუგდიდის თეატრმა მაყურებელს 2015 წლის 26 დეკემბერს შესთავაზა.
თეატრის ადმინისტრაციის ინფორმაციით, კულტურისა და ძეგლთა დაცვის სამინისტროს დაფინანსებით თეატრის შენობა სამხარაულის ექსპერტიზის ბიურომ შეამოწმა, რომელმაც უახლოეს მომავალში უნდა წარმოადგინოს დასკვნა ექვემდებარება თუ არა თეატრის შენობა რემონტს. თეატრის ხელმძღვანელობა იმედოვნებს, რომ არ დააყოვნებს შესაბამისი სტრუქტურების შემდგომი ნაბიჯები, რადგან არსებული მდგომარეობა ყოველდღიურად მძიმდება და უკიდურესად საგანგაშოა.