პენტაგონი ჯერჯერობით ოფიციალურად არ ადასტურებს, რომ სირიაში ისლამური სახელმწიფოს ერთ-ერთი ლიდერი ომარ ალ შიშანი იგივე თარხან ბათირაშვილი ლიკვიდირებულია. უწყების პრეს მდივანი პიტერ კუკი აცხადებს, რომ საჰაერო ოპერაცია შიშანის დაჯგუფების განადგურების მიზნით ნამდვილად ჩატარდა, მაგრამ დეტალებს არ აკონკრეტებს.
უცხოური მედია კი ავრცელებს ინფორმაციას,რომ ომარ ალ შიშანი, 4 მარტს სირიაში ალ შადადის პროვინციაში სარაკეტო იერიშებს ემსხვერპლა.
ალ შიშანზე ამერიკის შეერთებულ შტატებს ძებნა აქვს გამოცხადებული და მისი ადგილსამყოფელის დადგენისათვის რამდენიმე მილიონის ჯილდოც არის გამოყოფილი.
თარხან ბათირაშვილის ლიკვიდაციის შესახებ ინფორმაცია არ აქვს მის ოჯახს. კურიერთან კომენტარში მისი მამა აცხადებს, რომ
შვილთან დიდი ხანია კონტაქტი არ ქონია და ამის შესახებ არაფერი იცის. იგი იმედოვნებს, რომ ეს მორიგი მცდარი ინფორმაციაა.
თარხან ბათირაშვილი, საქართველოს მოქალაქეა. ის სამხედრო მოსამსახურე იყო, თუმცა წლების წინ საქართველო დატოვა და ტერორისტულ დაჯგუფებაში გაწევრიანდა .თარხან ბათირაშვილის ლიკვიდაციის შესახებ ინფორმაცია საერთაშორისო მედიამ რამდენჯერმე გაავრცელა, თუმცა არც ერთი მათგანი არ დადასტურდა.