კამათის ფომზე მიმდინარეობს დღეს ენერგეტიკის მინისტრის კახი კალაძის საკომიტეტო მოსმენა საქართველოს პარლამენტში
კანონმდებელთა კითხვები ძირითადად გაზპრომთან გამართულ მოლაპარაკებებსა და ენერგოუსაფრთხოების კუთხით შექმნილ ვითარებას ეხებოდა. ენერგეტიკის მინისტრმა "მნიშვნელოვანი" უწოდა "სოკართან" მიღწეულ შეთანხმებას. მან აღნიშნა, რომ მიღწეული შეთანხმების შედეგად, "სოკარი" საქართველოს დამატებით მოცულობებს მიაწვდის "შაჰდენიზის" მილსადენის მეშვეობით. ,,აზერბაიჯანი არის ჩვენი სტრატეგიული პარტნიორი. იგი ბუნებრივი აირის 90 %-ს გვაწვდის, თუ "სოკარი" აქამდე დამატებითი მოცულობების მოწოდებას ტექნიკურად ვერ უზრუნველყოფდა, დღეს, ერთობლივი მუშაობით, ეს პრობლემა არის გადაჭრილი და ჩვენ მომავალი წლების განმავლობაში გვექნება შესაძლებლობა მივიღოთ ბუნებრივი აირი "შაჰდენიზის" მილსადენიდან. – განაცხადა მან
უმცირესობის წევრებს შეკითხვები აქვთ იმასთან დაკავშირებით, რატომ ცრუობდა მინისტრი, როცა ამტკიცებდა, რომ "სოკარი" საქართველოს დამატებით გაზმომამარაგებას ვერ უზრუნველყოფდა, თუკი ახლა აცხადებს, რომ "სოკართან" მოლაპარაკებები წარმატებით დასრულდა და გაზმომარაგების პრობლემა აღარ დგას. "ნაციონალური მოძრაობის" წევრმა გოკა გაბაშვილმა გააკეთა განცხადება, რომ ,,სოკართან'' მოლაპარაკება საზოგადოების აქტიურობისა და ზეწოლის შედეგად მოხდა, რომ არა ეს, ,,გაზპრომთან'' მოლაპარაკებები იგივე გზით წარიმართებოდა, როგორც ეს ხელისუფლებას ჰქონდა ჩაფიქრებული და საქართველოს გაზმომარაგება რუსეთზე დამოკიდებული აღმოჩნდებოდა.
კახი კალაძეს თავის მართლება მოუხდა ტარიფებთან დაკავშირებითაც. "ნაციონალური მოძრაობის" წევრმა ეკა ხერხეულიემ მას დაუსვა კითხვა წინასაარჩევნო დაპირება ტარიფების განახევრებაზე, იყო მიზანმიმართული ტყუილი თუ არ ეყო მთავრობას კომპეტენცია დანაპირების სესრულებისათვის.
"მე ვფიქრობ, წინასაარჩევნოდ რაც იყო დადებული პირობა ტარიფების შემცირების თაობაზე, ეს ჩვენ მოვახერხეთ. თუმცა, დღეს გვაქვს განსხვავებული რეალობა, რის გამოც მოგვიწია ტარიფის ძველ ნიშნულზე დაბრუნება.
რაც შეეხება განახევრებას, თქვენ ვერ ნახავთ ვერც ერთ ვიდეომასალას, სადაც მე გამოვდიოდე და ვსაუბრობდე ტარიფების განახევრებაზე. ასეთი რამ ისტორიაში არ ყოფილა", – განაცხადა კალაძემ.