დღეს,ზუგდიდში იუსტიციის მინისტრმა თეა წულუკიანმა სამეგრელოს რეგიონული არქივის ახალი შენობა გახსნა. არქივის აქამდე არსებულ სამსართულიან შენობას სრული რეაბილიტაცია ჩაუტარდა, ამავდროულად, მის გვერდით აშენდა 4სართულიანი შენობა , სადაც საარქივო დოკუმენტების საცავები განთავსდა. შენობები ერთმანეთს მე -2 და მე -3 სართულებზე არსებული ხიდებით დაუკავშირდება. ახალ არქივში რეგიონის რაიონების – ზუგდიდის, აბაშის, მარტვილის, სენაკის, ჩხოროწყუს, წალენჯიხის და ხობის არქივების დოკუმენტები, სულ 371 218 საქმე იქნება დაცული. სამეგრელოს რეგიონულ არქივში დოკუმენტები 1920 -იანი წლებიდან ინახება და ისინი რეგიონის სოფლებისა და ქალაქების სოციალურ და კულტურულ ყოფას, ინფრასტრუქტურის განვითარების ეტაპებს, დემოგრაფიულ მონაცემებს და ადგილობრივი თვითმმართველობების მუშაობის ასახავს. სამეგრელოს რეგიონული არქივის სამშენებლო სამუშაოებზე 2 მილიონამდე ლარი დაიხარჯა.
სამეგრელოს რეგიონული არქივის ახალი შენობის გახსნის ღონისძიებას ცენტრალური და ადგილობრივი ხელისუფლების წარმომადგენლები დიპლომატიური კორპუსის წარმომადგენლებთან ერთად დაესწრნენ.