ხმაური იყო ცოტა ხნის წინ ზუგდიდის ცენტრალურ სუპერმარკეტში. ბაზრის მოვაჭრეებმა ტერიტორიაზე მოსულ მუშებს ხელსაწყოები ჩამოართვეს და დახლების დემონტაჟის საშუალება არ მისცეს. ისინი აცხადებენ, რომ მთელი ღამის განმავლობაში სავაჭრო ცენტრის ტერიტორიაზე დარჩებიან. "არაფრის დიდებით არ დავუშვებთ დემონტაჟის პროცესს, სისხლის ბოლო წვეთამდე დავიცავთ ამ ადგილს" – განაცხადეს მოვაჭრეებმა. ზუგდიდის ცენტრალური სუპერმარკეტის მოვაჭრეებმა საპროტესტო აქცია დღეს დილითაც გამართეს. აქციის მონაწილეებმა გზაც გადაკეტეს, რის გამოც რამდენიმე ხნის განმავლობაში მოძრაობა პარალიზებული იყო. მოვაჭრეების და ბაზრის ადმინისტრაციის განცხადებით, მერიის ზედამხედველობის სამსახურისგან მიიღეს წერილობითი შეტყობინება რკინის კონსტრუქციის დემონტაჟთან დაკავშირებით. ადგილზე მომუშავეები აცხადებენ, რომ ამით ისინი სამუშაო ადგილს დაკარგავენ.