ქალაქ ზუგდიდის მერი გასულ წელს შესრულებული სამუშაოებისშესახებ ანგარიშით ამჯერად ზუგდიდის დემოკრატიული ჩართულობის ცენტრში წარსდგა. ირაკლი გოგოხიამ დამსწრეებს, რომელთა უმრავლესობას რიგითი მოქალაქეები, უნივერსიტეტის სტუდენტები და არასამთავრობო ორგანიზაციები წარმოადგენდნენ, გასულ წელს განხორციელებული და დაგეგმილი პროექტების შესახებ ესაუბრა. ქალაქის პირველი პირი ერთი საათის განმავლობაში აცნობდა მათ ჩატარებული სამუშაოების შესახებ ინფორმაციას, რომლის დასასრულს შეხვედრის დამსწრეებს შეკითხვებისა და საკუთარი მოსაზრების გაცნობის საშუალება მიეცათ. სახალხო დამცველის ზუგდიდის ოფისის ახალი ხელმძღვანელი დაინტერესდა თუ რატომ არ არის განთავსებული მერიის ოფიციალურ გვერდზე საჯარო ინფორმაცია უწყების ხელმძღვანელი პირებისა და თანამშრომელთა შესახებ ბიოგრაფიული ცნობები. ამასთან, მოქალაქე ეგნატე შამუგია დაინტერესდა, რატომ არ არის გამოქვეყნებული ინფორმაცია თუ რამდენია საჯარო პირების საწვავისა და სატელეფონო საუბრების ხარჯები. მოქალაქეები ასევე დაინტერესდნენ, რამდენად ხარისხიანად შესრულდა ქალაქის ტერიტორიაზე ტროტუარებზე ფილების დაგების პროცესი, ამასთან, მათი თქმით ქალაქის სხვადასხვა ადგილას გაკეთებული პანდუსები შეზღუდული შესაძლებლობის მქონე პირებისთვის მოუხერხებელია. კითხვები ასევე შეეხო ყინული საციგურაო მოედანს, რომელიც 3 იანვარს დიდთოვლობისას ჩაიფუშა და რომლის სარეკონსტრუქციო სამუშაოები ამ დრომდე არ დაწყებულა და თეატრს, რომელიც ნგრევის პირასაა და ამ ეტაპზე კულტურულ დაწესებულებაში მუშაობა შეჩერებულია.
ქალაქის პირველმა პირმა დარბაზში გამოთქმულ შენიშვნებს და დასმულ კითხვებს ადგილზე უპასუხა. ირაკლი გოგოხიამ ჟურნალისტებთან საუბრისას აღნიშნა, რომ ყველა მითითებული ხარვეზი გამოსწორდება.
ქალაქ ზუგდიდის მერი ირაკლი გოგოხია 2015 წელს შესრულებული სამუშაოებისა და დაგეგმილი პროექტების შესახებ ანგარიშით უკვე მეორედ წარსდგა. იგივე ანგარიშით ქალაქის პირველი პირი გასულ კვირას საკრებულოს სხდომაზე დეპუტატების წინაშე წარსდგა.